बनेपा । शब्दयात्रा प्रकाशनको ११ औँ वार्षिक साधारण सभा सम्पन्न भएको छ । २०८१ साल पुस १३ गते शनिबार शब्दयात्रा प्रकाशनको सभाकक्षमा साधारण सभा सम्पन्न भएको हो ।

साधारण सभाले सञ्चालक समितिको प्रतिवेदन, लेखापरीक्षकको प्रतिवेदन, अनुमानित कार्यक्रम र आयव्यय विवरण पारित गर्नुका साथै आ. व. २०८१–८२ को लेखापरीक्षणका लागि दर्तावाला लेखापरीक्षक नियुक्त गरी निजको पारिश्रमिक तोकेको छ ।
सभाले संस्थाबाट सञ्चालन गर्दै आएका विभिन्न कार्यलाई निरन्तरता दिन, थप कार्यहरू सञ्चालन गर्न, वर्तमान अध्यक्ष हरिमञ्जुश्री, संचालकहरु हरि गोपाल प्रधान, कृष्णमणि कुइँकेल, लीलादेवी श्रेष्ठ र केदारनाथ तिमिल्सीना रहनुभएको छ ।

आगामी २ वर्षमा कार्यकाल समाप्त हुने भएको हुँदा सञ्चालक समितिले गर्दै आएका कार्यलाई सहयोग पुर्‍याउन र युवा सदस्यहरूको कार्यक्षमतामा वृद्धि गराई संस्थागत नेतृत्व गर्न सक्ने निरन्तर रुपमा कार्यरत गर्नको लागि ५ सदस्य कार्यसम्पादन समिति गठन गरेको छ ।

जनशक्ति विकास गर्न डा. भास्कर हुमागाईं, इ. रोशन मञ्जुश्री अधिकारी, कालिका त्रिपाठी पन्त, अमृत अधिकारी र वेदप्रसाद गौतम रहनुभएको छ ।

शब्दयात्रा प्रकाशनले आ. व. २०८०–८१ भित्र सम्पन्न गरेका कार्यहरूः
शब्दयात्रा प्रकाशनले आफ्नो नियमित कार्य गर्ने क्रममा आ. व. २०८०–८१ भित्र सम्पन्न गरेका महत्त्वपूर्ण कार्यक्रमहरू यसप्रकार छन् ।
१. यस प्रकाशनले व्यवस्थापन गरेको र विभिन्न व्यक्ति तथा संस्थाको आर्थिक सहयोगमा विभिन्न विधामा राखिएका २३ सम्मान, १३ पुरस्कार, १३ छात्रवृत्ति (१ पत्रकारिता र १ विकलाङ्गसहित), ४ विद्वत्वृत्ति र ३ कदरपत्र (काभ्रेपलान्चोक जिल्लाका पत्रकारहरूमा समर्पण गरिने) समर्पण गरियो ।
२. १४ पुस्तकको प्रकाशन र सार्वजनिक गर्ने कार्य सम्पन्न गरियो ।
३. नीलकण्ठेश्वर धाम संरक्षण समितिको सहकार्यमा नीलकण्ठेश्वर धाम परिसरमा १०८ शिवलिङ्ग स्थापना गरी अनावरण गरियो ।
४. नीलकण्ठेश्वर धाम संरक्षण समितिको सहकार्यमा शब्दसाधक अतिथिगृहको समुद्घाटन गरियो ।
५. नीलकण्ठेश्वरमा जग्गादाताहरूको नाम राखिएको शिलालेख र कृष्णगीता परिसर नाउँ राखिएको शिलालेख गरी २ शिलालेखको अनावरण गरियो ।
६. शब्दयात्रा समापन गान र नीलकण्ठेश्वरको आरती लगायत विभिन्न आध्यात्मिक गानको स्वराङ्कन गरियो ।
७. गुञ्जन संस्थासँगको संयुक्त आयोजनामा साहित्यिक विमर्श कार्यक्रम सम्पन्न गरियो ।
८. आध्यात्मिक लेखकहरूको भेला तथा अभिलेखीकरण एवं पूर्वीय संस्कृति र वर्तमान विकृतिबारे छलफल कार्यक्रम आयोजना गरियो ।
९. काभ्रेपलान्चोक जिल्ला समन्वय समितिद्वारा आयोजित कृषिमेलामा साहित्यिक र साङ्गीतिक कार्यक्रम आयोजना गरियो ।
१०. विभिन्न सन्दर्भ पारेर कविता वाचन (बद्रीविक्रम थापा र सुभाष खड्का विषयक) कार्यक्रमहरू सम्पन्न गरियो ।
११. पत्रकार युवराज गौतमलाई स्वास्थ्य–उपचारका लागि र साहित्यिक पत्रकार रोचक घिमिरेको अभिनन्दनका लागि विभिन्न आर्थिक सहयोग गरियो ।
१२. सावित्री जङ्गम थापा अध्ययन–अनुसन्धान केन्द्रको ब्रोसर तयार गरियो ।

यसै आ. व. मा यस संस्थाले ‘गुञ्जन’ नामक संस्थाबाट सम्मान प्राप्त गरेको छ ।
शब्दयात्रा प्रकाशनको अबको योजना:
शब्दयात्रा प्रकाशनले हालसम्म गरिरहेका कार्यहरू, जस्तैः सम्मान, पुरस्कार, छात्रवृत्ति, विद्वत्वृत्ति, कदरपत्र समर्पण, पुस्तक प्रकाशन आदि र विभिन्न अवसरमा सान्दर्भिक कार्यलाई निरन्तरता दिँदै आगामी दिनमा निम्नलिखित कार्यहरू पनि अगाडि बढाउनुपर्नेछ ।
१. पुस्तकालयलाई अझै व्यवस्थित (पुस्तकालयभित्र बसेर पढ्ने, आवतजावत गर्न सहज बनाउने) बनाई अनुसन्धाता पाठकको पहुँचसम्म पुर्‍याउनुपर्नेछ ।
२. दैनिक कार्य सञ्चालनका लागि व्यवस्थित कार्यकक्षको निर्माण गर्नुपर्नेछ ।
३. विशेष व्यक्तिका सालिक स्थापना गर्नुपर्नेछ ।
४. शब्दवाटिकालाई पूर्णता दिनुपर्नेछ ।
५. सावित्री जङ्गम थापा अध्ययन–अनुसन्धान कक्षलाई महिलासँग सम्बन्धित अ्रध्ययन–अनुसन्धान केन्द्रका रूपमा विकास गर्नुपर्नेछ ।
६. सङ्ग्रहालयको व्यवस्था गर्नुपर्नेछ ।
७. आर्थिक रूपमा सक्षम हुन कोषमा वृद्धि गर्नुपर्नेछ ।