काठमाडौं । नेपाली कांग्रेसकानेता शेखर कोइराला पक्षले पार्टीभित्र प्रदेश सरकारमा मन्त्रीका लागि भागबन्डा माग गरेको छ ।कांग्रेस–एमाले गठबन्धनपछि प्रदेशमा नयाँ सरकार बन्ने अवस्थामा रहेकाले शेख् पक्षले आफ्नो समूहका सांसदलाई पनि मन्त्री बनाउन माग गरेको हो ।

साउन ८ गते नेता कोइरालाले उपसभापति धनराज गुरुङ, महामन्त्री गगन थापालगायतसँगको छलफलमा प्रदेशमा मन्त्रीको भाग पाउनुपर्ने निष्कर्ष गरेको थियो । अहिले नयाँ गठबन्धन अनुसार लुम्बिनी, बागमती, गण्डकी र मधेशमा नयाँ सरकार बनिसकेको छ । तर, केही प्रदेशमा मन्त्रीको टुंगो लागिसक्दा समेत पार्टी सभापति शेरबहादुर देउवाले कुनै सल्लाह र समन्वय नगरेको नेता कोइरालाको गुनासो छ ।

कोइराला पक्षले कोेशीमा २, बागमतीमा ३, गण्डकीमा २, लुम्बिनीमा २, कर्णालीमा १ र सुदूरपश्चिममा १ जना मन्त्री पाउनुपर्ने दावी गरेको छ ।

नेता कोइरालाको सचिवालयका अनुसार बैठकाके निष्कर्ष सभापति देउवालाई सुनाइए पनि अहिलेसम्म सभापतिबाट कुनै जवाफ आएको छैन । प्रदेशमा नयाँ सरकार गठन भइरहेको सञ्चार माध्यममा आएका समाचारबाहेक आफूहरु बेखबर रहेको कोइरालाको सचिवालयले जनाएको छ ।

लुम्बिनी सरकारमा मन्त्री पठाउँदा संस्थापन पक्षले एकलौटी गरेको भन्दै असन्तुष्ट प्रदेश सभापति अमरसिंह पुनले देउवालाई ब्ुधबार ध्यानाकर्षण पत्र पठाएका थिए । पत्र पठाएपनि सभापति देउवाले वेवास्ता गरेको प्रदेश सभापति पुनको गुनासो छ ।
एमालेसँग सत्ता गठबन्धन गरेपछि सभापति देउवाले सबै पक्षलाई समेटेर सरकारमा लैजाने बताएका थिए । तर, तीन वटा प्रदेशमा नयाँ सरकार गठन भइसक्दा समेत आफ्नो पक्षकालाई मन्त्री नबनाएको कोइराला पक्षको गुनासो रहेको छ ।