काठमाडौं । प्रधानमन्त्री पुष्पकमल दाहाल ‘प्रचण्ड’ले संघीय संसदमा विश्वासको मत पाएका छन् । प्रधानमन्त्री प्रचण्डले बुधबार प्रतिनिधिसभामा प्रस्तुत गरेको विश्वासको मतसम्बन्धी प्रस्तावको पक्षमा १५७ सांसदले समर्थन गरेका छन् । प्रधानमन्त्रीले संसदमा विश्वासको मत पाएको यो तेस्रोपटक हो ।

बुधबार प्रस्तावको विपक्षमा ११० मत परेको छ । प्रधानमन्त्री प्रचण्डलाई मत दिन्न भन्नेमा १ मत परेको थियो । प्रतिनिधिसभामा बुधबार २६८ सांसद उपस्थित थिए ।

प्रधानमन्त्री प्रचण्डले संविधानको धारा १०० को उपधारा (२) अनुसार विश्वासको मत लिएका हुन् । उक्त धारामा प्रधानमन्त्रीले प्रतिनिधित्व गर्ने दल विभाजित भएमा वा सरकारमा सहभागी दलले आफ्नो समर्थन फिर्ता लिएमा ३० दिनभित्र विश्वासको मतका लागि प्रतिनिधिसभा समक्ष प्रस्ताव राख्नुपर्ने प्रावधान छ ।

यही फागुन २१ गते प्रधानमन्त्री प्रचण्डले नेपाली कांग्रेससँगको गठबन्धन तोडेपछि नेकपा एमाले, राष्ट्रिय स्वतन्त्र पार्टी, जनता समाजवादी पार्टी, एकीकृत समाजवादीसहितका दलको नयाँ समीकरण बनेको थियो । त्यही दिन कांग्रेस सरकारबाट बाहिरिँदै समर्थनसमेत फिर्ता लिएको थियो । त्यसैले प्रधानमन्त्री प्रचण्डले विश्वासको मत लिएका हुन् ।

यसअघि २०७९ पुस १० गते प्रधानमन्त्री नियुक्त भएका प्रचण्डले त्यही २६ गते विश्वासका मत लिएका थिए । त्यतिबेला सदनमा उपस्थित २७० सांसदमध्ये २६८ जनाले उनलाई समर्थन गरेका थिए । र, २०७९ फागुन १५ गते एमाले सरकारबाट बाहिरिएर गठबन्धन फेरबदल भयो । चैत ६ गते प्रधानमन्त्री प्रचण्डले पुनः विश्वासको मत लिएका थिए । त्यतिबेला सदनमा उपीसथत २६२ सांसदमध्ये विश्वासको मतको प्रस्तावमा पक्षमा १७२ र विपक्षमा ८९ मत परेको थियो ।

क–कसले गरे समर्थन ?

प्रचण्ड नेतृत्वको सरकारलाई नेकपा एमाले, राष्ट्रिय स्वतन्त्र पार्टी, नेकपा एकीकृत समाजवादी र जनता समाजवादी पार्टीका अलाव नागरिक उन्मुक्ति पार्टीले समेत समर्थन जनाएको छ ।

नेपाली कांग्रेस, राष्ट्रिय प्रजातन्त्र पार्टी, जनमत पार्टी, लोकतान्त्रिक समाजवादी पार्टी, राष्ट्रिय जनमोर्चा, नेपाल मजदूर किसान पार्टी लगायतले भने सरकारलाई विश्वासको मत दिएनन् ।

प्रतिनिधिसभामा एमालेको ७६, अनि माओवादीको ३२ सिट रहेको छ भने राष्ट्रिय स्वतन्त्र पार्टीको २१, जसपा नेपालको १२, नेकपा एकीकृत समाजवादीको १० र नागरिक उन्मुक्ति पार्टीका ४ सिट रहेको छ ।

प्रतिनिधिसभामा एमालेका कुल सांसदको संख्या ७९ रहेकोमा टोपबहादुर रायमाझी निलम्बित छन् भने सुवास नेम्वाङको निधन भएको छ । सभामुख देवराज घिमिरेले समेत विश्वासको मतमा सहभागी हुँदैनन् ।

तल्लो सदनमा नेपाली कांग्रेसका ८८ जना सांसद छन् । तर त्यसमध्ये टेकबहादुर गुरुङ निलम्बनमा छन् । त्यस्तै, राप्रपाका १४, जनमत पार्टीका ६, लोसपाका ४, नेमकिपा, जनमोर्चा र आम जनता पार्टीका १÷१ जना सांसद छन् ।

प्रचण्डले पहिलोपटक विश्वासको मत लिँदा संसदका १२ मध्ये १० दल र सबै स्वतन्त्र सांसद्ले विश्वासको मत दिएका थिए । नेपाल मजदुर किसान पार्टी र राष्ट्रिय जनमोर्चाका सांसद्ले भने प्रचण्डलाई मत दिएका थिएनन् । तल्लो सदनमा ती दलका एक–एक सांसद् छन् ।

दोस्रोपटक विश्वासको मत लिँदा एमाले र राप्रपाले विश्वासको मत दिएनन् भने नेमकिपाका एक सांसद् तटस्थ बसेका थिए ।