काठमाडौं । आफ्नो खानामा धेरै क्याल्सिअम खाने मानिसहरूले आन्द्राको क्यान्सर हुने जोखिम घटाउन सक्ने थप प्रमाणहरू एउटा अध्ययनले पत्ता लगाएको छ । यूकेमा गरिएको अध्ययनका अनुसार दैनिक एक गिलास दूध त्यसका लागि सहयोगी हुनसक्छ ।

अनुसन्धाताहरूले १६ वर्षभन्दा माथिका पाँच लाख जनाभन्दा धेरै महिलाको आहारको विश्लेषण गरेका थिए । त्यसक्रममा उनीहरूले गाढा–हरियो सागपात, पाउरोटी र गाईको दूध बाहेकका नरिवल वा बदाम लगायतबाट बनाइने दूधको सेवनबाट पनि आन्द्रामा क्यान्सरको जोखिम गर्न मद्दत पुग्ने निष्कर्ष निकालेका छन् ।

क्यान्सरसम्बन्धी परोपकारी संस्थाहरूले स्वस्थ तथा सन्तुलित आहार, स्वस्थ तौल र धूमपान सेवन नगर्नु आन्द्राको क्यान्सरको जोखिम कम गर्ने सबैभन्दा उत्तम उपाय भएको बताउने गरेका छन् ।

यसको प्रभाव कति ठूलो छ ?

हालैको एउटा समीक्षाले दुग्ध पदार्थहरूले आमाशय (आन्द्रा) मा हुनसक्ने क्यान्सरको जोखिम कम गर्ने पत्ता लगाएको थियो । अक्सफर्ड विश्वविद्यालय र क्यान्सर रिसर्च यूकेको अध्ययनले डेरी वा गैरडेरी खानेकुराहरूमा पाइने क्याल्सिअमले क्यान्सर कम गर्नसक्ने देखाएको हो ।

हरेक दिनको खानेकुरामा थप ३०० मिलिग्राम क्याल्सिअम वा ठूलो गिलासमा भरी दूध पिउँदा क्यान्सरको जोखिम १७ प्रतिशत कम हुने अनुसन्धानमा उल्लेख छ । बिहानको खानामा अन्न, फलफूल, कार्बोहाइड्रेट, सिरिअल, फाइबर र भिटामिन सी खाँदा पनि क्यान्सरको जोखिम कम हुने र दुग्ध पदार्थभन्दा त्यसको प्रभाव अलि कम हुने अध्ययनले देखाएको छ ।

क्याल्सिअमले के गर्छरु के मा पाइन्छ?

हाम्रो हड्डी बलियो बनाउन र दाँत स्वस्थ राख्नका लागि क्याल्सिअम महत्त्वपूर्ण खनिज हो । तर यसले निश्चित प्रकारका क्यान्सरहरूबाट पनि हामीलाई जोगाउन सक्ने प्रमाणहरू अहिले बढ्दो क्रममा छन् । दूध, दही र चीजमा प्रशस्त क्याल्सिअम हुन्छ। हामीमध्ये धेरैजसोको खानेकुरामा क्याल्सिअम पाउने प्रमुख स्रोत दुग्धजन्य पदार्थहरू हुन् ।

क्याल्सिअम सोया र चामलबाट बनेको पेय, सेतो पाउरोटी, नट्स, बियाँ र फलफूलहरू जस्तै सुकेको अञ्जीर, कर्ली केल जस्ता अन्य खानेकुराहरूमा पनि पाइन्छ। यो ल्याक्टोज९फ्री दूधमा पनि हुन्छ । यसले क्यान्सर निम्त्याउन सक्ने पित्त एसिडलाई जमाउने र आमाशयमा फ्याटी एसिडलाई फैलन सघाउने भएका कारण क्याल्सिअमले आन्द्राको क्यान्सरबाट जोगाउन सहयोग पुग्ने अध्ययनमा उल्लेख छ ।

आन्द्राको क्यान्सरका लक्षणहरू निम्न छन्

पाचन प्रक्रियामा परिवर्तन। जस्तैः कमलो दिसा, दिसा लागिरहने वा कब्जियत हुने ।
मलद्वारबाट रगत बग्नु वा दिसामा रगत देखिनु ।
कुनै कारणबिना तौल कम हुनु ।
थकान लागिरहनु वा श्वास फेर्न समस्या हुनु ।

माथिका मध्ये कुनै पनि लक्षण देखिएको अवस्थामा चिकित्सकलाई जाँच गराउन अध्ययनले सुझाव दिएको छ।