एजेन्सी । विश्वव्यापी तापक्रम वृद्धिलाई १ दशमलव ५ प्रतिशत डिग्री सेल्सियसमा सीमित राख्दा पनि तटीय क्षेत्र खतरामा रहेको वैज्ञानिकहरूले चेतावनी दिएका छन् । झन्डै दुई सय वटा देशले पृथ्वीको तापक्रम १ दशमलव ५ डिग्री सेल्सियसमा राख्ने प्रयास गर्ने प्रतिबद्धता जनाए पनि अनुसन्धानकर्ताहरूले यसलाई तटीय जनसङ्ख्याका लागि सुरक्षित मान्न नहुने चेतावनी दिएका हुन् ।

आउँदा शताब्दीहरूमा विश्वले समुद्री सतहमा धेरै मिटर वा त्योभन्दा बढीको अत्यधिक हानिकारक वृद्धि देख्न सक्ने वैज्ञानिकहरूलाई बताएका छन् । अहिले बरफका ढिक्काहरू कसरी परिवर्तन भइरहेका छन् र विगतमा कसरी परिवर्तन भएका थिए भन्नेबारेमा गरिएका अध्ययनहरूको समीक्षा गरेपछि उनीहरूले यो निष्कर्ष निकालेका खबरमा उल्लेख छ । तर वैज्ञानिकहरूले तापक्रम वृद्धिलाई रोक्न सकिने प्रत्येक डिग्रीको अंशले पनि जोखिमहरूलाई धेरै हदसम्म सीमित गर्नेमा जोड दिएका छन् ।

विश्वको वर्तमान अवस्थानुसार मानिसहरूले ठूलो मात्रामा जीवाश्म इन्धन जलाउन शुरू गर्नुभन्दा पहिले सन् १८०० को दशकको अन्त्यतिरको तुलनामा यस शताब्दीको अन्त्यसम्ममा पृथ्वीको तापक्रम झन्डै ३ डिग्री सेल्सियसले बढ्ने अनुमान छ ।

तर पृथ्वीको तापक्रम १ दशमलव ५ डिग्री सेल्सियसमा राख्दा पनि ग्रीनल्यान्ड र अन्टार्कटिकामा बरफ निरन्तर पग्लने अनुसन्धानकर्ताहरूले बताएका छन् । तापक्रम परिवर्तनले यति ठूलो बरफको पिण्डमा पूर्ण प्रभाव पार्न शताब्दी लाग्न सक्ने उनीहरूको भनाइ छ ।

सन् २०१५ को पेरिस जलवायु सम्झौताले विश्वका राष्ट्रहरू विश्वव्यापी तापक्रम वृद्धिलाई औद्योगिक कालअघिको स्तरको तुलनामा १ दशमलव ५ डिग्री सेल्सियसभन्दा बढ्न नदिने प्रयास गर्न सहमत भएका थिए । अहिले यही सम्झौता कार्यान्वयनका लागि दवाब झेलिरहेका बेला वैज्ञानिकहरूले यतिले नपुग्ने बताएका हुन् ।