काठमाडौं । सर्वसाधारणका लागि बहुप्रतिक्षिति धरहरा बिहीबारदेखि खुला गरिएको छ । संविधान दिवसका अवसरमा धरहरा सर्वसाधारणलाई चढ्न खुला गरेको हो । शहरी विकास मन्त्रालयले धरहरा चढ्न अर्को व्यवस्था नभएसम्म निशुल्क गरेको छ । अर्थात धरहरा चढेको पैसा लाग्दैन ।

मन्त्रालयको शहरी विकास तथा भवन विभागअन्तर्गतको केन्द्रीय आयोजना कार्यान्वयन इकाइले यसको व्यवस्थापनको जिम्मा पाएको छ । सरकारले गठन आदेश नबनाउञ्जेल सर्वसाधारणलाई निःशुल्क गरिएको हो ।

निःशुल्क प्रवेश गर्न dharhara.gov.np  बाट अनलाइन टिकट बुक गर्न सकिने आयोजना निर्देशक कोशनाथ अधिकारीले जानकारी दिए । काउन्टरमै पनि फ्रि टिकट पाइने छ । टिकटमा आधारमा धरहरा चढ्न दिइने मन्त्रालयले जनाएको छ ।

मन्त्रालयका अनुसार वेबसाइटबाटै इन्ट्री गर्न मिल्ने, बुक गर्न मिल्ने, क्यूआर कोड लिन मिल्ने व्यवस्था मिलाइँदै छ । एक दिनमा अधिकतम ६ सयले धरहरा चढ्न पाउनेछन् । त्यसमध्ये १ सय कोटा वृद्ध, अशक्त, अपाङ्गता भएकालाई छुट्याइएको छ । प्रत्येक एक घण्टा सय जनाले चढ्ने गरी व्यवस्था मिलाइएको छ ।

शहरी विकास मन्त्रालयले धरहरा चढ्न निशुल्क गरेपछि त्यसको असर ‘स्काईवाक टावर’लाई पर्ने देखिन्छ । कललादीस्थित स्काईवाकले नेपालीलाई एक हजार रुपैयाँ शुल्क लिँदै आएको छ । काठमाडौंको भ्यू हेर्न स्काईवाक चढ्नेहरु अब धरहराले तान्ने देखिन्छ । ‘२२ तले धराहरा निशुल्क चढ्न पाएपछि एक हजार तिरेर किन स्काईवाक चढ्ने ?’ धरहरा चढ्न आएका धादिङका निमेश कार्कीले भने, ‘एक महिनाअघि स्काईवाक चढेको थिएँ, अहिले धरहरा । मलाई त धरहरा चढ्दै रमाइलो लाग्यो । धरहराबाट काठमाडौं भ्याल्ली पूरै देखिन्छ ।’

निजी कम्पनीद्वारा सञ्चालित स्काईवाकले एक हजार रुपैयाँ लिएको भन्दै सुरुदेखि नै सर्वसाधारणले महँगो भयो भन्दै आएका थिए । तर, काठमाडौं घुम्न आउनेहरुले महँगो भएपनि काठमाडौं हेर्न स्काईवाक चढ्ने गरेका छन् । तर, अब निशुल्क भएपछि सर्वसाधारण धरहरातिर आकर्षित हुने देखिन्छ ।

यता मन्त्रालयले भने ढिलो चाँडो धरहरा चढेको शुल्क लिने जनाएको छ । ‘तर, एकदमै कम शुल्क लिइने छ’ मन्त्रालय स्रोतले भन्यो, ‘यो करिब एक महिना निशुल्क नै हुनेछ । त्यसपछि केही व्यवस्था मिलाएर केही शुल्क तोकिने छ ।’ उनका अनुसार बढीमा एक सयदेखि एक सय ५० सम्म शुल्क तोकिन सक्ने छ ।