चिनियाँ कम्युनिष्ट पार्टीका पोलिटब्युरो सदस्य तथा छोङछिङ शहरका प्रमुख एवम् सचिव युआन च्या च्युन काठमाडौँ आइपुगेका छन् । २६ सदस्यीय टोलीको नेतृत्व गर्दै उनी भर्खरै काठमाडौँ ओर्लिएका हुन् । 

कोलम्बोबाट आएको श्रीलंकन एयरको जहाजमा युआन नेतृत्वको टोली पौने १२ बजे त्रिभुवन अन्तराष्ट्रिय विमानस्थलमा अवतरण गरेको थियो ।उनीहरुलाई नेकपा माओवादी केन्द्रका महासचिव देव गुरुङ र यहाँस्थित चिनियाँ राजदूत छ्न सोङ्गलेले विमानस्थलको विशिष्ट कक्षमा स्वागत गरेका छन् । 

तीन दिने राजनीतिक भ्रमणमा काठमाडौं आइपुगेको युआनसहितको भिआइपी टोली बत्तीसपुतलीस्थित होटल द्वारिकाजमा बस्नेछ । टोलीका अरु सदस्यको लागि म्यारियट होटलमा बस्ने प्रवन्ध मिलाइएको बताइएको छ । 

राष्ट्रपति तथा चिनियाँ कम्युनिष्ट पार्टीका महासचिव सि चिनफिङका अति विश्वासपात्रमध्ये एक युआनले यहाँ रहँदा उच्चस्तरीय राजनीतिक भेटघाट गर्ने कार्यक्रम छ । तर, यहीबेला प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड र एमाले अध्यक्ष केपी शर्मा ओलीलगायत कम्युनिष्ट पार्टीका शीर्ष नेताहरु देश बाहिर छन् ।

कम्युनिस्ट पार्टीका टप २५ नेतामध्येमा पर्ने उनी अन्तरीक्ष बिज्ञानसम्बन्धी इन्जिनियर पनि हुन् । उनको भ्रमणको तयारीनिम्ति ३ वटा एड्भान्स टोली एक हप्तावीच नेपाल आइसकेका छन् ।