काठमाडौं (एजेन्सी) । इजरायली आक्रमणबाट लेबनानमा मृत्यु हुनेको संख्या १४ सय पुगेको छ । हिजबुल्लाहविरुद्धको आक्रमणलाई तीव्रता दिँदा पछिल्लो ११ दिनमा १४ सय जनाको मृत्यु भएको हो ।

राष्ट्रसंघीय बालकोष (युनिसेफ)ले आक्रमणमा परी १ सय बालबालिकाको मृत्यु भएको जनाएको छ । आक्रमणबाट ७ हजार ५ सय मानिस घाइते भएका र १० लाख मानिसहरु विस्थापित भएका छन् । राष्ट्रसंघीय शरणार्थीसम्बन्धी उच्चायोगका अनुसार इजरायलको आक्रमणका कारण हालसम्म २ लाख मानिसहरु सिरियातर्फ भागेका छन् ।

सिरियामा युद्धबाट ज्यान जोगाउन लेबनानमा शरणार्थी जीवन बिताइरहेकाहरु पुनः सिरियातर्फ नै भाग्न बाध्य भएका हुन् । इजरायलले बेरुतस्थित हिजबुल्लाहका केन्द्रहरु लक्षित गर्दै हवाई आक्रमण गर्ने क्रम जारी राखेको छ ।

लेबनानी सहर त्रिपोलीमा भएको आक्रमणमा हमासका वरिष्ठ नेता र उनको परिवार मारिएको हमासले जनाएको छ । तर इजरायलले यसको औपचारिक पुष्टि गरेको छैन । यता, इजरायली सेनाले स्थल आक्रमण पनि जारी राखेको छ ।