काठमाडौं (एजेन्सी) । भ्लादिमिर पुटिन पाँचौँ पटक रुसको राष्ट्रपतिमा निर्वाचित भएका छन् । तीन जना प्रतिस्पर्धीलाई पछि पारेर पुटिन पाँचौँ पटक राष्ट्रपतिमा निर्वाचित भएका हुन् ।

पुटिनले कुल मतको ८७ प्रतिशत मत प्राप्त गरेका बताइएको छ । चुनावमा ७४ प्रतिशतभन्दा धेरै मत खसेको र पुटिनले ८० लाख मत प्राप्त गरेको अन्तराष्ट्रिय खबरहरुमा उल्लेख छ ।

पश्चिमा देशहरूले भने पुटिनको निरङ्कुशताका कारण विपक्षीलाई उम्मेदवार बन्न नदिएको र अहिले प्रतिस्पर्धी भनिएकाहरू पुटिनकै नजिकका व्यक्ति भएको आरोप लगाएका छन् । अमेरिकाले चुनावलाई हास्यास्पद र नाटकको संज्ञा दिएको छ ।

जर्मनीले यो चुनावलाई सेन्सरशिप, दमन र हिंसाको बीचमा प्रोक्सी चुनाव भनेको छ । यस्तै बेलायतका विदेशमन्त्री डेभिड क्यामरुनले रुसको चुनावको निन्दा गर्दै यसलाई अवैध भनेका छन् । युक्रेनका राष्ट्रपति भोलोदिमिर जेलेन्स्कीले रुसी तानाशाहहरूले नाटक गरेको आरोप लगाएको छ ।

तर चुनाव जितेपछि पत्रकार सम्मेलन गर्दै रुसी राष्ट्रपति पुटिनले पश्चिमा देशहरूको लोकतन्त्रभन्दा रुसको लोकतन्त्र र चुनाव धेरै विश्वसनीय रहेको बताएको छ । ‘यो चुनाव पारदर्शी र पूर्णरूपमा सही छ । अमेरिकाजस्तो होइन जहाँ १० डलरमा भोट किन्न सकिन्छ’, पुटिनले भनेका छन् ।

उनले युक्रेनमाथिको आक्रमण नरोकिने र नेटोले रुसविरुद्ध कुनै कदम चालेमा आणविक हतियारको प्रयोग हुन सक्ने चेतावनी दोहो¥याए । पत्रकारको एक प्रश्नमा चीनको प्रशंसा गरेका पुटिनले ताइवान चीनकै भूभाग भएको बताए ।

रुसमा तीन दिनसम्म चलेको मतदान रुसले कब्जा गरेको युक्रेनी क्षेत्र जापोरिझिया, खेरसन, डोनेट्स्क र लुहानस्कमा पनि भएको थियो । यस्तै विदेशका सबै दूतावास र कुटनीतिक नियोगमा पनि अनलाइन भोटिङको व्यवस्था थियो ।

सन् १९९९ मा तत्कालीन राष्ट्रपति बोरिस इल्तसिन बिरामी परेपछि पुटिनलाई राष्ट्रपति बनेका थिए । त्यसपछि सन् २००० देखि चार वर्षबाहेक पुटिन लगातार रुसको राष्ट्रपति छन् । सन् २००८ देखि २०१२ सम्म भने उनी प्रधानमन्त्री थिए ।
७१ वर्षका पुटिन राजनीतिसँगै खेलकुदमा पनि उत्तिकै अब्बल छन् । कराँतेमा उनी ब्ल्याकबेल्ट खेलाडी हुन्, घोडचढीमा पनि उनको विशेष दख्खल छ । पाककलामा पनि पुटिनको दख्खल छ ।