काठमाडौँ । काठमाडौं महानगरपालिकाको कार्यपालिका बैठक आज बस्दैछ । लामो विवादपछि मेयर बालेन्द्र शाह (बालेन) ले आजका लागि बैठक बोलाएका छन् ।

आजको बैठकमा प्रमुख प्रशासकीय अधिकृत सरोज गुरागाईं भने उपस्थित नहुने भएका छन् । गुरागाईंलाई बिदामा पठाएर आज कार्यपालिकाको बैठक राख्ने सहमति भएको छ ।

महानगर प्रमुख शाह र प्रमुख प्रशासकीय अधिकृत गुरागाईंबीचको विवादपछि गत पुस यता कार्यपालिका बैठक बस्न सकेको थिएन । 

आजको कार्यपालिका बैठक अघि बालेनले महानगरको आगामी आर्थिक वर्षको नीति तथा कार्यक्रम र बजेटका लागि स्रोत अनुमान तथा सीमा निर्धारण समितिको बैठक बिहान ११ बजेका लागि बोलाएका छन् । उक्त समितिले महानगरमा प्राप्त हुने आन्तरिक आय, राजस्व बाँडफाँटबाट प्राप्त हुने रकम, अनुदान, ऋण र अन्य आयको प्रक्षेपण तथा सोको सन्तुलित वितरणको खाका तथा बजेट सीमा निर्धारण गर्नेछ । त्यसपछि उपप्रमुख संयोजक रहेको राजस्व परामर्श समितिको बैठक बस्नेछ र त्यसपछि मात्र कार्यपालिका बैठक बस्ने बताइएको छ ।

स्थानीय सरकार सञ्चालन ऐन, २०७४ को दफा ७१ अनुसार स्थानीय तहले आगामी आर्थिक वर्षको राजस्व र व्यय (बजेट) को अनुमान कार्यपालिकाबाट स्वीकृत गराई असार १० भित्र सभामा पेस गर्नुपर्ने उल्लेख भएपनि काठमाडौं महानगरमा मेयर र प्रमुख कार्यकारी अधिकृतबीचको विवादले सो समयभित्र नीति तथा कार्यक्रम र बजेट आउन नसकेको हो ।

संघीय मामिला तथा सामान्य प्रशासन मन्त्रालयको आँकडा अनुसार अहिलेसम्म ७५३ मध्ये ५३५ स्थानीय तहले मात्र आफ्नो बजेट मन्त्रालयमा रेकर्ड गराएका छन् । अझै २१८ स्थानीय तहले आउदो आर्थिक बर्षको बजेट विवरण मन्त्रालयमा बुझाएका छैनन् ।