ललितपुर , गोदावरी नगरपालिकाको आयोजनामा जारी उपत्यकाव्यापी अन्तरपालिका खुला गोदावरी मेयर कप फुटबलको फाइनलमा काठमाडौं महानगरपालिका पुगेको छ । 

गोदावरी–१० टाहाखेलस्थित निर्माणाधीन गोदावरी बहुउद्देश्यीय रंगशालाको झ्यालुन्टार मैदानमा मंगलबार सम्पन्न पहिलो सेमिफाइनल खेलमा कीर्तिपुर नगरपालिकालाई ३–० ले हराउँदै  काठमाडौंले दोस्रोपटक उपाधि जित्ने अवसर बनाएको छ । पहिलो संस्करणमा चन्द्रागिरीलाई हराउँदै काठमाडौंले उपाधि जितेको थियो । 

आगामी २ जेठमा हुने फाइनलमा काठमाडौंले गोदावरी नगरपालिका र दक्षिणकाली नगरपालिकाबिचको विजेतासँग प्रतिस्पर्धा गर्नेछ । काठमाडौंका लागि खेलका म्यान अफ दि म्याच मनिष सेढाईले २ गोल तथा राज पौडेलले १ गोल गरे । पहिलो हाफको अन्तिमतिर ३ मिनेट सम्हालिन नसक्दा कीर्तिपुरले लगातार २ गोल खायो ।

काठमाडौंका लागी खेलको ४५ औं मिनेटमा  सेढाईले सुरुवाती गोल गरे भने लगत्तै ईन्जुरी समयमा  पौडेलले  थप गोल गर्दै अग्रता दोब्बर पारे । काठमाडौंका लागि अर्को एक गोल सेढाईले ७९औं मिनेटमा  गरे ।

काठमाडौं समूह बीको विजेताका रुपमा सेमिफाइनलमा पुगेको हो भने कीर्तिपुर समूह डीको विजेताका रुपमा सेमिफाइनलमा प्रवेश गरेको हो । 

आयोजक गोदावरी र दक्षिणकाली भिड्ने 
गोदावरी मेयर कप फुटबलको अर्को सेमिफाइनलमा आयोजक गोदावरी नगरपालिकाले दक्षिणकाली नगरपालिकासँग बुधबार प्रतिस्पर्धा गर्दैछ । समूह ए मा महालक्ष्मी नगरपालिकालाई ६–१ ले तथा बाग्मती गाउँपालिकालाई ७–० ले हराएको गोदावरीले समूह चरणमा ललितपुर महानगरपालिकासँग १–१ गोलको बराबरी खेलेको थियो ।

समूह सीमा रहेको दक्षिणकालीले कागेश्वरी मनोहरा नगरपालिकालाई ५–० ले तथा चन्द्रागिरी नगरपालिकालाई २–१ ले हराउँदै सेमिफाइनलमा पुगेको हो । 

गोदावरी मेयर कपमा काठमाडौ उपत्यकामा रहेका २१ पालिकामध्ये काठमाडौं जिल्लाबाट ६, ललितपुरबाट ५ र भक्तपुरबाट २ पालिकाको सहभागिता रहेको छ ।