काठमाडौं । मिस वर्ल्डको फिनालेमा उत्कृष्ट ४० मा पुग्न सफल प्रियंकारानी जोशी आइतबार बेलुका स्वदेश फर्किएकी छन् । भारतमा आयोजित मिस वर्ल्ड प्रतियोगितामा सहभागिता जनाएर उनी आइतबार बेलुका स्वदेश फर्किएकी हुन् ।

उनलाई त्रिभुवन अन्तर्राष्ट्रिय विमानस्थलमा द हिडन ट्रेजरका अध्यक्ष अजय रत्न स्थापित, पूर्व अध्यक्ष सुवर्ण क्षेत्री, निर्देशक प्रमोद कसंकार र अन्य पदाधिकारीहरुले स्वागत गरे । प्रियंका ‘ब्युटी विथ अ पर्पस’ विधामा एसिया र ओसियाना महादेशबाट उत्कृष्ट घोषित भइन् । यो विजयलाई उनलाई क्वार्टरफाइनलमा पु¥यायो ।

उनी अन्तिम ४० बाट बाहिरिएकी थिइन् । ‘ब्युटी विथ अ पर्पस’मा महादेशीय विजेता बनेसँगै प्राप्त गरेको अवार्ड पनि उनले स्वदेश ल्याएकी छन् । प्रियंकाले चितवनको दुर्गम इच्छाकामना गाउँपालिकामा केन्द्रीय विद्युत प्रसारण लाइन पहुँचको प्रोजेक्टलाई ब्युटी विथ अ पर्पस विधामा प्रस्तुत गरेकी थिइन् । झण्डै एक महिनासम्म भारतको दिल्ली र मुम्बईमा चलेको ७१ औं मिस वर्ल्डको फिनाले शनिबार बेलुका मुम्बईको जियो कन्भेन्सन सेन्टरमा आयोजना भएको थियो ।