काठमाडौं । प्रधानमन्त्री केपी शर्मा ओलीले संविधानले सबैलाई अधिकार सम्पन्न बनाएको बताएका छन् । आज संविधान दिवसको अवसरमा शुभकामना सन्देश दिँदै उनले सो कुरा बताएका हुन् ।

‘आज संविधान दिवस, हाम्रो राष्ट्रिय दिवस । दशकौं लामो संघर्ष र सयौंको बलिदानको फलस्वरूप जनता आफैंले आफ्ना लागि तय गरेको शासन प्रणाली र जनताले चुनेको संविधानसभाले पहिलोपटक निर्माण गरेको संविधान । यसले सबैलाई अधिकार सम्पन्न बनाएको छ’, शुभाकामना सन्देशमा भनेका छन् ।

उनले यही संविधानले दिएको स्वतन्त्रताको उपभोग गरेर भविष्य सुरक्षित गर्नुपर्ने बताएका छन् । प्रधानमन्त्री ओलीले अहिलेको संविधानले सबैखाले विचार, समुदाय, भूगोल, लिङ्ग, जाति र धर्मका भावनाहरुलाई यसले संरक्षण गरेको पनि बताएका छन् ।

उनले भनेका छन्, ‘सबैखाले विचार, समुदाय, भूगोल, लिङ्ग, जाति र धर्मका भावनाहरुलाई यसले संरक्षण गरेको छ । यसको संरक्षण गरेर मात्र हामीले उपभोग गरेका अधिकारको रक्षा हुन सक्छ ।’

‘जनताले लामो समयसम्म भोगेको निरंकुशता आजको पुस्ताले पनि बिर्सन नहुने भन्दै ओलीले यो स्वतन्त्रता गुमेको दिन कस्तो हुन्छ भन्ने सम्झँदा समाजलाई निरंकुशताले नियन्त्रण गरेको दुई दशक अगाडिको चित्र मष्तिस्कमा आउने उल्लेख गरेका छन् ।