काठमाडौँ । इजरायली प्रधानमन्त्री बेन्जामिन नेतान्याहू अमेरिका भ्रमणमा जाने भएका छन् ।

नेतान्याहू आगामी सोमबार वाशिंगटन डीसी पुग्ने बताएका छन् । उनले ह्वाइट हाउसमा अमेरिकी राष्ट्रपति डोनाल्ड ट्रम्पलाई भेट्ने कार्यक्रम तय भएको छ ।

यो भ्रमण त्यस्तो समयमा भइरहेको छ जब राष्ट्रपति ट्रम्पले गाजामा युद्ध अन्त्य गर्न र युद्धबन्दीहरूलाई रिहा गर्न इजरायली सरकारमाथि दबाब बढाइरहेका छन् ।

इजरायलका रणनीतिक मामिला मन्त्री रोन डर्मरको वाशिंगटन भ्रमणको लगत्तै नेतान्याहूको भ्रमण हुन लागेको हो । डर्मरले यस हप्ता अमेरिकी अधिकारीहरूसँग गाजा युद्धविराम, इरान र अन्य मुद्दाहरूमा छलफल गरेका थिए ।

गत हप्ता शुक्रबार ट्रम्पले सार्बजनिक रुपमा अर्को एक हप्ता भित्र गाजामा युद्धविराम हुने बताएका थिए ।