काठमाडौं । ऐतिहासिक हनुमानढोका दरबार क्षेत्रअन्तर्गतको काष्ठमण्डप परिसरमा ‘शाक्ति समूह, काठमाडौं, नेपाल’ द्वारा मानव बेचबिखनविरुद्ध जनचेतना अभिवृद्धि गर्न नाटक कार्यक्रम प्रस्तुत गरिएको छ।

यो नाटकको उद्देश्य समाजमा मानव बेचबिखनको बढ्दो समस्या प्रति जनचेतना फैलाउनु रहेको थियो। कार्यक्रममा कलाकारहरूले विभिन्न नाटकीय प्रस्तुतीमार्फत मानव तस्करीका कारण, प्रक्रिया र त्यसको पीडादायी प्रभाव दर्शाएका थिए।

स्थानीय बासिन्दा, विद्यार्थी, समाजसेवी तथा विभिन्न संघसंस्थाका प्रतिनिधिहरूको उल्लेखनीय उपस्थिति रहेको कार्यक्रममा दर्शकहरूले प्रस्तुतीलाई अत्यन्त सशक्त र मनछुने बताएका थिए।

शाक्ति समूहका अनुसार, यस्ता सांस्कृतिक माध्यमहरू प्रयोग गरेर मानव तस्करीजस्ता गम्भीर सामाजिक मुद्दाहरूमा जनचेतना फैलाउने अभियानलाई निरन्तरता दिइनेछ।

कार्यक्रम अन्त्यमा आयोजकले सबैलाई मानव बेचबिखनविरुद्ध एकजुट भई काम गर्न आह्वान गरेका थिए।

तस्बिर : पद्मसागर कक्षपती