काठमाण्डौ । आईसीसी क्रिकेट विश्वकप लिग–२ मा नेपालले नेदरल्यान्ड्सलाई हराएको छ । स्कटल्यान्डको फोर्थहिल क्रिकेट मैदानमा गएराति सकिएको खेलमा नेपालले नेदरल्यान्ड्सलाई १६ रनले हरायो ।

नेपालले दिएको २ सय ३७ रनको लक्ष्य पछ्याएको नेदरल्यान्ड्स ४९ ओभर २ बलमा २ सय २० रन बनाउँदा अलआउट भयो । नेदरल्यान्ड्सका वेस्ले बरेसीले सबैभन्दा धेरै ३६ रन बनाए । नेपालका नन्दन यादव र सन्दीप लामिछानेले ३÷३ विकेट लिए ।

यसअघि टस हारेर ब्याटिङको निम्तो पाएको नेपालले ५० ओभरमा ९ विकेट गुमाएर २ सय ३६ रन बनायो । नेपालका आरिफ शेखले ८४ रन बनाए । नेदरल्यान्ड्सका पउल भान मीकेरेनले ४ विकेट लिए ।

योसँगै नेपालले लिग–२ अन्तर्गत त्रिदेशीय एकदिवसीय अन्तर्राष्ट्रिय क्रिकेट शृङ्खलाको आफ्नो चौथौ चरणमा ४ मध्ये ३ खेल जितेको छ । नेपालले पहिलो खेलमा स्कटल्यान्डलाई १ विकेटले हराएको थियो । यस्तै दोस्रो खेलमा नेपालले नेदरल्यान्ड्सलाई ५ विकेटले हराएको थियो । तेस्रो खेलमा भने नेपाल स्कटल्यान्डसँग २ रनले पराजित भएको थियो ।

नेपालले लिग–२ को तालिकामा १६ खेलमा १२ अङ्क जोड्दै सातौं स्थानमा छ । यस्तै नेदरल्यान्ड्स दोस्रो र स्कटल्यान्ड तेस्रो स्थानमा छ । लिग–२ को शीर्ष स्थानमा अमेरिका छ । अब नेपाल, घरेलु टोली स्कटल्यान्ड र नेदरल्यान्ड्सबीच आउँदो आइतवारदेखि टी–२० अन्तर्राष्ट्रिय शृङ्खला शुरू हुनेछ ।