काठमाडौं । ७२ औं मिस वल्र्डमा सहभागी हुन मिस नेपाल सृच्छा प्रधान गतहप्ता भारततर्फ प्रस्थान गरेकी छन् । सन् २०२५ को७ देखि ३१ मेसम्म भारतको तेलांगानाको हैदराबादमा यसवर्षको मिस वल्र्ड आयोजना हुँदैछ । त्यसतर्फ प्रस्थान गर्नुअघि सृच्छाले जितको लागि आफूले उत्कृष्ट प्रयास गर्ने बताइन् ।

फिनालेका लागि आफू उत्साहित रहेको उनको भनाई छ । सन् २०२३ मा मिस नेपालको उपाधि जितेकी सृच्छा झण्डै २ वर्षपछि अन्तर्राष्ट्रिय प्रतिस्पर्धामा जान लागेकी हुन् । उनको ब्याचका विजेताले भने अघिल्लो वर्ष मिस अर्थ र मिस इन्टरनेसनलमा सहभागिता जनाइसकेका छन् ।

जलवायु अभियन्ता समेत रहेकी सृच्छाले वातावरण संरक्षणको सन्देश दिने ‘पञ्च प्रणाली’ परियोजनालाई मिस वल्र्डमा प्रस्तुत गर्नेछिन् ।

बलिउड अभिनेता सोनु सुदलाई जजको रुपमा चिनाइएको छ । यसवर्ष १०९ जना प्रतिस्पर्धीले मिस वल्र्डमा प्रतिस्पर्धा गर्ने जनाइएको छ । फिनाले ३१ मेमा आयोजना हुनेछ । फिनालेमा सहभागी हुन नेपालबाट हिडन ट्रेजरको टोली पनि हैदराबाद प्रस्थान गर्ने तयारी छ ।

जलवायु अभियन्ता समेत रहेकी २५ वर्षिय सृच्छा मिस वल्र्डको फिनालेलाई लिएर उत्साहित छिन् । मिस नेपालको ताज जितेको २ वर्षपछि अन्ततः उनले अन्तर्राष्ट्रिय प्रतिस्पर्धामा सहभागिताको मौका पाएकी छन् ।

मिस वल्र्डको महत्वपूर्ण विधा ‘ब्युटी विथ अ पर्पस’मा उनले ‘पञ्च प्रणाली’को अवधारणा प्रस्तुत गर्दैछिन् ।
‘मलाई नेपालको न्यारेटिभ सिफ्ट गर्न मन छ । यसकारण यो अवधारणा अघि सार्दैछु’ भन्छिन्, ‘पञ्च प्रणाली’ भन्ने परियोजना होइन, यो ‘पहलकद्मी’ हो । यसको प्रभाव तत्काल देखिँदैन तर आगामी पुस्तामा देखिनेछ ।’

‘हामी भल्नरेबल देश मात्र होइनौं, सोलुसन प्रोभाइडर मुलुक पनि हौं । यो भाष्यलाई सिफ्ट गर्न सक्छु भनेर मैले यो यात्रा सुरुवात गरेकी हुँ । यसलाई विश्वभर फैलाउन चाहन्छु’ उनी भन्छिन् ।

२ वर्ष सृच्छा प्रधानको प्रतियोगिताको लागि तयारीमै बिते । मिस वल्र्ड हुने वा नहुने अन्योलताको बीचमा उनको समय गुज्रियो । यस बीचमा मैले “सबैभन्दा मीठो कुरा त नेपालमा बस्न पाएँ । नत्र पढाइको लागि विदेश गइन्थ्यो होला” भन्छिन्, ‘सुरुमा म क्लाइमेट एक्टिभिस्टि हुँ । पृथ्वीलाई बचाउने मात्र भन्दा पनि सबै जीव जनावरको भ्वाइस अघि राखौं भन्ने हो । म भावनात्मकरुपमा केही नर्भस छु । उत्साह पनि छ । यो दायित्व लिन म तयार पनि छु ।’

यसबीच मैले बोल्ने शैलीदेखि ब्यायाम, स्टाइलिङ र मेकअप सिकिन् । ‘यो प्रोसेसमा धेरै मेन्टर पाएको छु । मलाई पूर्वमिस नेपालहरुले पनि गाइड गर्नुभएको छ । शान्त कसरी हुने भन्ने कुरा पनि हुन्छ । मैले आध्यामिकरुपमा कसरी सशक्त हुने पनि सोचेकी छु’ उनले भनिन् । फाइनल समारोहमा सृच्छाले परम्परागत नेपाली बाजा सारङ्गीबाट सिर्जना गरिएको छोटो संगीत पनि पेश गर्नेछिन् ।

‘पेजेन्ट्री भनेको हेर्दाखेरी ग्ल्यामर र फेसनजस्तो देखिन्छ । तर, पेजेन्ट्री भनेको आफ्नो शान्ततालाई मनाउने काम हो । देखाउनलाई काम गर्ने होइन । आफ्नो शरिरलाई जोड्ने कुरा हो । सारंगी सिक्दा पनि मैले त्यो प्रोसेस महसुस गरेँ’ उनले भनिन् । आफूलाई चिन्नु सबैभन्दा महत्वपूर्ण कुरा रहेको उनको मत छ ।

विगतका वर्षहरुमा द हिडन ट्रेजरले गरिरहेको मिस नेपाल कार्यक्रममा ३ विधाको प्रतियोगिता मिस नेपाल वल्र्ड, मिस अर्थ, मिस इन्टरनेशनल भइरहेकोमा हाल एक विधा मिस कस्मो (Miss Cosmo) थपिएको छ ।

द हिडन ट्रेजरका पदाधिकारीहरुमा अध्यक्ष अजय रत्न स्थापित, पूर्व अध्यक्ष सुवर्ण क्षेत्री र डाइरेक्टर रुपेश प्रधानका साथै सृच्छाका परिवारले प्रतियोगितामा सफलताको शुमकामना सहित बिदाई गरेका थिए ।