काठमाडौं । पूर्वराजा ज्ञानेन्द्र शाहले गोरखाको गोरखनाथ मन्दिरमा पूजा अर्चना गरेका छन् । शनिबार बिहान १० बजे पूर्वराजा शाह गोरखा दरबारस्थित गोरखनाथ मन्दिरमा पुगेका थिए । त्यहाँ उनलाई मन्दिरका पूजारीहरूले स्वागत गरेका थिए ।

पूर्वराजा शाहले करिब २ घण्टा लगाएर गोरखनाथ र गोरखकाली मन्दिरमा पूजाअर्चना गरे । गोरखनाथको शाहवंशीय राजाहरूको राजपाठ सञ्चालनमा विशेष सम्बन्ध रहेको पाइन्छ । उनकै आशिर्वादले तत्कालीन राजाहरुले युद्ध जितेको बताइन्छ ।

इतिहासहरुमा गोरखनाथको आर्शीवाद र प्रेरणाका कारण द्रव्य शाहले लिगलिगकोटमाथि विजय हासिल गर्न सफल भएको पढ्न पाइन्छ ।

गोरखनाथले दिएको दही पृथ्वीनारायण शाहको खुट्टामा परेको र तिमीले टेकेको भूमि तिम्रो राज्य हुने छ भनी आशीर्वाद दिएका कारण नेपाल एकीकरणमा उनी सफल भएको पनि बताइन्छ ।

यस्तै, पूर्वराजा शाहले मनोकामना मन्दिरको पनि दर्शन गर्ने कार्यक्रम रहेको । पूर्वराजाको संवाद सचिवालयका अनुसार त्यसका निम्ति आजै उनी कुरिनटार जाने भएका छन् । पूर्वराजा गोरखा पुग्दा भव्य स्वागत गरिएको थियो ।

पछिल्लो समय ज्ञानेन्द्र शाहले भेटघाट बढाएका छन् । श्ुक्रबार बिहान गोरखा पुगेका उनले त्यहाँका जनतालाई सम्बोधन समेत गरेका छन् ।