काडमाडौं । जिल्ला प्रशासन कार्यालय काठमाण्डौले पशुपति मन्दिर क्षेत्र वरपर मासु र जाँडरक्सी निषेध गरेको छ । भोलि तीजको अवसरमा पशुपति क्षेत्रभित्र पवित्रता कायम गर्ने उद्देश्यले मासु, जाँडरक्सी र अन्य नशालु पदार्थ निषेध गरिएको हो ।

यसका लागि जिल्ला प्रशासन कार्यालय काठमाण्डौले पूर्वमा गौशाला मित्रपार्क सडकदेखि पूर्व, पश्चिममा पशुपति क्षेत्रको पूर्व सिमानादेखि पश्चिम, उत्तरमा गौशाला तीलगंगा चक्रपथदेखि उत्तर र दक्षिणमा मित्रपार्क, उमाकुण्ड गौरीघाट हुँदै बाग्मतीदेखि दक्षिणसम्म चार किल्ला तोकेको छ ।

यो क्षेत्रमा मासु, जाँडरक्सी तथा नशालु पदार्थहरु उत्पादन, बेचविखन, ओसारपसार, भण्डारण गर्न र खान आजदेखि नै निषेध गरिएको जिल्ला प्रशासन कार्यालय काठमाण्डौले जनाएको छ ।