काठमाडां । संघीय संसदको दुवै सदनको हिउँदे अधिवेशन बोलाउन सरकारले राष्ट्रपतिसमक्ष सिफारिस गर्ने निर्णय गरेको छ । सिंहदरबारमा सोमबार अपराह्न बसेको मन्त्रिपरिषद बैठकले माघ १८ गते शुक्रबार प्रतिनिधि सभा र राष्ट्रिय सभाको अधिवेशन बोलाउन राष्ट्रपति रामचन्द्र पौडेलसमक्ष सिफारिस गर्ने निर्णय गरेको हो ।

कानुन मन्त्री अजयकुमार चौरसियाका अनुसार मन्त्रिपरिषदले गरेका अन्य निर्णयबारे सरकारका प्रवक्ताले नियमित पत्रकार सम्मेलनमा जानकारी गराउने छ ।

प्रमुख प्रतिपक्षी नेकपा (माओवादी केन्द्र) सहित ६ विपक्षी दलहरूले पत्रकार सम्मेलन गर्दै सरकारलाई तत्काल हिउँदे अधिवेशन बोलाउन दबाब दिएका थिए। सरकारले हालै पाँच वटा अध्यादेश ल्याउने निर्णय गरेको छ ।