काठमाडौँ । बलिउड अभिनेत्री ऐश्वर्या राय बच्चन कान्स फिल्म फेस्टिभलको रेड कार्पेटमा हिडेको विषय हरेक बर्ष चर्चाको विषय हुने गर्दछ । यस बर्षपनि अन्ततः कान्स फिल्म फेस्टिभलमा ऐश्वर्या पुगेकी छन् ।

यसअघि बलिवुडबाट आलिया भट्ट, हुमा कुरैशी र डायना पेन्टीसहितका अभिनेत्रीहरूले आफ्नो उपस्थिति जनाइसकेका छन् ।

ऐश्वर्या नीलो रंगको आकर्षक गाउनमा रेड कार्पेटमा देखिएकी हुन् । विशेष डिजाइन गरिएको उक्त गाउनमा परेको तह र बनावटका कारण उनी जलपरीजस्तै देखिएकी थिइन् । गाउनसँगै उनले लामो दुपट्टा पनि लगाएकी थिइन्, जुन दुवै हातमा बेरिएको अवस्थामा जमिनसम्म पुगेको देखिन्थ्यो । ऐश्वर्याको गाउन डिजाइनर मोहित रायले तयार गरेका हुन् । 

ऐश्वर्या राय बच्चन सन् २००२ देखि कान्स फिल्म फेस्टिभलमा सहभागी हुँदै आएकी छन् । हरेक वर्ष उनी आफ्नो फरक शैली र आकर्षक पहिरनका कारण चर्चामा रहने गरेकी छन् । यसपटक भने उनी केही ढिलो गरी महोत्सवमा पुगेकी हुन् ।

फ्रान्सको कान्स सहरमा भइरहेको यो महोत्सवमा विश्वभरका चलचित्रकर्मी र कलाकारहरूको सहभागिता रहने गर्दछ । महोत्सवको समापन आज हुँदैछ ।