काठमाडौं । शब्दयात्रा प्रकाशनको आयोजनामा गएको शनिबार सम्मान समर्पण तथा पुस्तक र गान सार्वजनिकीकरण कार्यक्रम सम्पन्न भएको छ । कार्यक्रममा विभिन्न सात विधाका सम्मान, सात जना राष्ट्रिय प्रतिभामा समर्पण गरिएको थियो भने एउटा पुस्तक र एउटा गान सार्वजनिक गरिएको छ ।

कार्यक्रमको सञ्चालन हरि मञ्जुश्री र समापन प्रा.डा. हेमाङ्गराज अधिकारीले गरेका थिए । कालिका त्रिपाठी पन्तको सभापतित्वमा सम्पन्न कार्यक्रममा सरस्वती सापकोटाले समुद्घाटन, केदारनाथ तिमल्सिनाले रुद्राक्षमाला अर्पण, अमृत अधिकारीले छायाङ्कन तथा स्वराङ्गन र निर्मला श्रेष्ठले सम्मान सामग्रीको व्यवस्थापन गरेका थिए ।

गोपाल पराजुली, जयदेव अधिकारी, पद्मकला–भीमप्रसाद सुवेदी र रुद्रलाल शर्मा धितालको तस्बिरमा पुष्पार्पण गरिएको उक्त कार्यक्रममा चयन समितिका सदस्यहरूलाई लोकेन्द्र ढकालले उपहार समर्पण गरेका थिए । नवराज दाहाल ‘उत्साही’ले कृति सार्वजनिकको व्यवस्थापन गरेका थिए भने शैलेन्द्र सिम्खडाले हास्यव्यङ्ग्य कविता प्रस्तुत गरेका थिए ।

कार्यक्रममा डा. नारायणप्रसाद खनाल, चन्द्रप्रसाद न्यौपाने, लक्ष्मी उप्रेती, बालिका गिरी, जीतबहादुर श्रेष्ठ, उर्मिला ढुङ्गाना सुवेदी र अकुर शाहले शब्दयात्रा प्रकाशन पुस्तकालयका लागि पुस्तकहरू उपहार प्रदान गरेका थिए । पुस्तकालयका तर्फबाट हरिगोपाल प्रधान, शिव बन्जारा र प्रजापति तिमिल्सिनाले ती पुस्तकहरू ग्रहण गरेका थिए ।

सम्मान ग्रहण गर्नेहरूमा डा. हेमाङ्गराज अधिकारी, रामबाबु सुवेदी, डा. नारायणप्रसाद खनाल, ‘वनिता’ साहित्यिक पत्रिका, शैलेन्द्र सिम्खडा, चन्द्रप्रसाद न्यौपाने र लालबहादुर भुजेल रहेका छन् ।

भाषासेवी डा. हेमाङ्गराज अधिकारीमा पद्मकला–भीमप्रसाद सुवेदी भाषासेवा सम्मान समर्पण गरियो । उनलाई उपहार, भेटी र किरीट कोष व्यवस्थापक प्रा. लालानाथ सुवेदीले तथा अभिवन्दनापत्र गीतिभास्कर मच्छेश्वर सापकोटाले समर्पण गरेका थिए । बालसाहित्यकार रामबाबु सुवेदीमा विष्णुमाया–टीकाप्रसाद बालसाहित्य समर्पण गरियो । उनलाई किरीट र उपहार सन्देश पराजुलीले, भेटी कोष व्यवस्थापककी अर्धाङ्गिनी माधवी पराजुलीले तथा अभिवन्दनापत्र डा. हेमाङ्गराज अधिकारीले समर्पण गरिएको थियो ।

समालोचक डा. नारायणप्रसाद खनालमा हरिगोपाल प्रधान समालोचना सम्मान समर्पण गरियो । उनलाई भेटी र किरीट कोष व्यवस्थापक हरिगोपाल प्रधानले तथा अभिवन्दनापत्र रामबाबु सुवेदीले समर्पण गरेका थिए । उनीहरूलाई चयन समितिका संयोजक प्रा. केदारनाथ श्रेष्ठले पुष्पमाला र उपहार समर्पण गरेका थिए ।

‘वनिता’ साहित्यिक पत्रिकाका लागि सम्पादक लक्ष्मी उप्रेती, कृष्णलाल अधिकारी साहित्यिक पत्रिका सम्मान समर्पण गरियो । उनलाई माला चन्द्रप्रसाद न्यौपानेले, उपहार शैलेन्द्र सिम्खडाले, भेटी डा. नारायणप्रसाद खनालले, किरीट रामबाबु सुवेदीले र अभिवन्दनापत्र डा. हेमाङ्गराज अधिकारीले समर्पण गरेका थिए ।

यसैगरी हास्यव्यङ्ग्यकार शैलेन्द्र सिम्खडामा रुद्रलाल शर्मा हास्यव्यङ्ग्य सम्मान समर्पण गरियो । उनलाई भेटी र किरीट कोष व्यवस्थापक शारदाप्रसाद शर्माका तर्फबाट ढकलप्रसाद धितालले तथा अभिवन्दनापत्र डा. हेमाङ्गराज अधिकारीले समर्पण गरेका थिए । महाकाव्यकार चन्द्रप्रसाद न्यौपानेमा वसन्त शर्मा कविताकाव्य सम्मान समर्पण गरियो । उनलाई भेटी र किरीट कोष व्यवस्थापक कविप्रसाद प्याकुरेलका तर्फबाट कविता आचार्यले तथा अभिवन्दनापत्र शैलेन्द्र सिम्खडाले समर्पण गरेका थिए ।

अनुसन्धाता लालबहादुर भुजेलमा जयदेव अधिकारी अनुसन्धान सम्मान समर्पण गरियो । उनलाई भेटी र किरीट कोष व्यवस्थापक राजेन्द्र विरहीले तथा अभिवन्दनापत्र चन्द्रप्रसाद न्यौपानेले समर्पण गरेका थिए । उनीहरू तीनैजनालाई चयन समितिका सदस्य लीलादेवी श्रेष्ठले पुष्पमाला र उपहार समर्पण गरेका थिए ।

उक्त समारोहमा हरि मञ्जुश्रीद्वारा लिखित तथा सङ्गीतबद्ध गान ‘ए रुद्र ओ रुद्र’ सार्वजनिक गरियो । यस गानका गायक वसन्त कुइकेलले गानलाई सार्वजनिक गरेको हो । समारोहमा डा. इन्दुुल केसीद्वारा लिखित ‘हरि मञ्जुश्रीका जागरण गान’ नामक पुस्तक पनि सार्वजनिक गरियो । कृतिकार डा. इन्दुल केसी र अनुसन्धाता लालबहादुर भुजेलले उक्त पुस्तक संयुक्त रूपमा सार्वजनिक गरेका थिए ।