काठमाडौं । प्रधानमन्त्री सुशीला कार्की यतिखेर राजनीतिक बृत्तमा मात्र नभएर सामाजिक सञ्जालसमेत चर्चामा छिन् । जनताले सोचेभन्दा शान्तिपूर्ण रुपमा निर्वाचन गराउन सफल भएपछि प्रधानमन्त्री कार्की चर्चाको विषय बनेकी हुन् । नेपालको पहिलो महिला प्रधानमन्त्री समेत रहेकी उनको अहिले चौतर्फी चर्चा र प्रशंसा भइरहेको छ ।

छोटो अवधिमा समेत शान्तिपूर्ण वातावरणमा निर्वाचन गराउन सफल भएपछि प्रधानमन्त्री कार्कीको अन्तराष्ट्रिय राजनीतिकमा समेत चर्चा भइरहेको छ । यसैबेला कार्कीलाई अब राष्ट्रपति बनाउनुपर्ने चर्चा र माग उठ्न थालेको छ ।

महावीर पुनले चुनाव जितेलगत्तै प्रधानमन्त्री कार्कीलाई अब राष्ट्रपति बनाउनुपर्ने धारणा राखे । म्याग्दीबाट स्वतन्त्र उम्मेदवारी दिएर चुनाव जितेका पूर्वमन्त्री समेत रहेका पुनले एक भिडियो सन्देश जारी गर्दै वर्तमान राष्ट्रपतिको कार्यकाल सकिएपछि कार्कीलाई राष्ट्रपति बनाउन प्रस्ताव गरेका हुन् ।

उनले सन्देशमा भनेका छन्, ‘मेरो अन्तर हृदयले प्रधानमन्त्री सुशीला कार्कीज्यूलाई हालको सम्माननीय राष्ट्रपति रामचन्द्र पौडेलज्यूको कार्यकाल सकिएपछि राष्ट्रपति बनाउनुपर्छ भनेर भनिरहेको छ । किनभने उहाँले साहसपुर्वक देशलाई अत्यन्तै संकटपूर्ण स्थितिबाट निकास दिन नेतृत्व गर्नुभयो । मैले चापलुसी गरेको पटक्कै होइन । कसैले अन्यथा नसम्झनु होला । मनमा लागेको कुरा भनेको मात्र हो ।’

महावीर पुनले मात्र नभएर यतिखेर वर्तमान प्रधानमन्त्री कार्कीलाई देशको राष्ट्रपति बनाउनुपर्ने आवाज उठाउन थालेका छन् । प्रधानमन्त्री कार्कीले देशलाई संकटपूर्ण स्थितिबाट निकास दिएको चर्चा स्वभाविक पनि हो । किनभने जतिखेर उनले अन्तरिम सरकारको प्रधानमन्त्री पदमा सपथ लिँदै गर्दा ६ महिनाभित्र निर्वाचन गराउने जिम्मेवारी उनको काँधमा आएको छ । त्यो जिम्मेवारी सफलतापूर्वक सम्पन्न गराएर देशलाई निकास दिएकी छन् ।

यस अर्थमा पनि अब सुशीलाई कार्कीलाई राष्ट्रपति बनाउनुपर्ने आवाज उठ्न थालेको हो । त्यसैले जनअपेक्षालाई बुझेर अब बन्ने सरकारले उनलाई राष्ट्रपति बनाउनुपर्छ । जनचाहना अनुसार काम गर्नु जननिर्वाचित सरकारको दायित्व पनि हो । यो कुरा अब बन्ने नयाँ सरकारले बुझनुपर्छ ।

यस्तै, इन्दिरा राना मगरलाई सभामुख बनाउनपर्ने माग पनि उठ्न थालेको छ । समाजसेवामार्फत राजनीतिकमा होमिएकी राना मगर यसअघि उपसभामुख भइसकेकाले अब उनलाई सभामुख बनाउनपर्ने जनस्तरबाट आवाज उठिरहेको छ । जुन जायज पनि छ ।

समाजमा आफ्नै किसिमको पहिचान बनाएकी राना मगर यो पटक रास्वपाबाट प्रतिनिधिसभा सदस्य निर्वाचित भएकी छन् । तर, उनलाई एक सांसदमात्र नभएर नागरिक सभामुखको रुपमा देख्न चाहन्छन् । उक्त कुरा सामाजिक सञ्जालहरुमा अहिले पोखिरहेको छ । त्यसैले अब बन्ने नयाँ सरकारले राना मगरलाई सभामुख बनाएर जनचाहनाको कदर गर्नु पर्ने देखिन्छ ।

हालै सम्पन्न प्रतिनिधिसभा निर्वाचनमा राष्ट्रिय स्वतन्त्र पार्टी (रास्वपा)ले झण्डै दुई तिहाइ बहुमत ल्याएको छ । यसका साथै, रास्वपाले सरकार गठनको प्रक्रिया सुरु गरेको छ । रास्वपालाई त्यतिकै यो जनादेश प्राप्त भएको होइन । पुराना दल र नेताहरुबाट वाक्क दिक्क भएर देश र जनताका लागि केही गर्छ कि भन्ने आशा र भरोसा गरेर जनताले त दिएको हो ।

त्यसैले पनि रास्वपाको एकल यो सरकारले जनचाहना र अपेक्षालाई मूर्तरुप दिँदै जानुपर्छ । त्यसैले अहिले जनस्तरमा सुशीला कार्कीलाई राष्ट्रपति र इन्दिरा राना मगरलाई सभामुख बनाउनुपर्ने जनआवाजलाई रास्वपाले कदर गर्दै सम्बोधन गनुपर्छ ।