काठमाडौं । प्रतिनिधिसभा सदस्य निर्वाचन नजिकिँदै गर्दा त्रिभुवन अन्तर्राष्ट्रिय विमानस्थलबाट हुँदै आएको आन्तरिक उडानमा चाप बढेको छ । यही आउने बिहीबार अर्थात २१ फागुनमा निर्वाचन हुँदैछ ।

निर्वाचनको मिति नजिकिँदै गर्दा यहाँ भित्रिनेभन्दा बाहिरिने यात्रुको संख्या बढ्दै गएको विमानस्थल कार्यालयले जनाएको हो ।
विमानस्थलका सूचना अधिकारी तेजबहादुर पौड्यालका अनुसार पछिल्लो समय आन्तरिक उडानतर्फ दैनिक १४ हजार हाराहारी यात्रुले काठमाडौँबाट ओहोरदोहोर गर्दै आएका छन् ।

हाल काठमाडौँबाट दैनिक करिब १३० उडानबाट भरिभराउ यात्रु बाहिरिने गरेका छन् । उनले भने, ‘निर्वाचन नजिकिएसँगै आन्तरिक विमानस्थल प्रयोग गर्ने हवाईयात्रुको ओहोरदोहोर बाक्लिँदै गएको छ । प्रतिकूल मौसमका कारण उडानमा केही ढिलाइ हुने गरेपनि यात्रुको चापअनुसार उडान संख्या बढ्दै गएको छ ।’

विगतका निर्वाचनमा आन्तरिक उडान ठप्प हुँदै आएपनि यस पटक मतदानका दिन पनि आन्तरिक र अन्तर्राष्ट्रिय तर्फको हवाई उडान नियमित रहने जानकारी दिँदै उनले फागुन २१ गते उडानको टिकट भएका यात्रुले ढुक्कसँग यात्रा गर्न सक्ने बताए ।
निर्वाचनका लागि मतदाता गन्तव्यतर्फ लाग्न थालेसँगै अहिले वायुसेवा कम्पनीको व्यापारसमेत दसैँतिहारमा जस्तै बढेको छ । विमानस्थल कार्यालयको तथ्यांक्अनुसार फागुन ११ गते काठमाडौँबाट भएका २३६ उडानबाट १४ हजार २८१ यात्रुले ओहोरदोहोर गरेका छन् । जसमध्ये सात हजार २१८ यात्रु बाहिरिएका छन् भने सात हजार ६३ यात्रु काठमाडौँमा अवतरण गरेका हुन् ।

त्यस्तै फागुन १२ गते भएका २३९ उडानबाट १२ हजार ७३४ यात्रुले आन्तरिकतर्फको उडान भरेका छन् । जसमध्ये छ हजार ८९९ यात्रु बाहिरिएका छन् भने पाँच हजार ८३५ यात्रु काठमाडौँ भित्रिएका छन् ।

विमानस्थल कार्यालयका अनुसार फागुन १३ गते भएका २४९ उडानबाट १४ हजार ४६५ यात्रुले उडान भरेका छन् । १३ गते सात हजार ५४१ यात्रु बाहिरिएका हुन् भने छ हजार ९२४ यात्रु भित्रिएका हुन् ।

फागुन १४ गते भएका २४३ उडानबाट १३ हजार ४२४ यात्रुले ओहोरदोहोर गरेका छन् । जसमध्ये सात हजार २४४ यात्रु काठमाडौँबाट बाहिरिएका छन् भने उक्त दिन छ हजार १८० यात्रु भित्रिएको विमानस्थल कार्यालयले जनाएको छ ।
कार्यालयका अनुसार निर्वाचनअघिका तीन दिन र निर्वाचनपछिका दुई दिन हवाई उडानमा अत्यधिक चाप हुने देखिएको छ ।

नेपाल वायुसेवाको आम्दानीमा उल्लेखनीय सुधार

यसैबीच नेपाल वायुसेवा निगमको आम्दानीमा उल्लेखनीय सुधार भएको छ । निगमको अर्धवार्षिक कार्यसम्पादनमा उत्साहजनक सुधार देखिएको हो ।

निगमको कार्यकारी सञ्चालकको जिम्मेवारी अमृतमान श्रेष्ठले सम्हालेसँगै निगमको कार्यसम्पादनमा समेत सुधार भएको छ । अमृतमान श्रेष्ठ निगमको कार्यकारी सञ्चालकमा आएसँगै कार्यसम्पादनमा उल्लेखनीय सुधार भइरहेको अवस्थामा आम्दानीमा पनि सुधार भएको हो । कुनै पनि संस्था सफल हुनका लागि सञ्चालक सक्षम हुनुपर्छ भन्ने उदाहरण अहिले निगम बनेको छ ।

निगमका चालु आर्थिक वर्षको साउनदेखि पुससम्मको आम्दानी र यात्रु संख्या गत आर्थिक वर्ष २०८१÷०८२ को सोही अवधिको तुलनामा उल्लेखनीय प्रगति हासिल गरेको तथ्यांकले देखाएको छ ।

उक्त अवधिमा निगमको कुल आम्दानी करिब सात प्रतिशतले वृद्धि भएको छ भने यात्रु संख्या करिब १८ दशमलव ७ प्रतिशतले वृद्धि भएको छ ।

उपलब्ध जहाजहरूको अधिकतम उपयोग गर्दै विभिन्न गन्तव्यमा नियमित र प्रभावकारी उडान सञ्चालन गरिएकाले आम्दानी तथा यात्रु संख्या दुवैमा वृद्धि भएको निमगले जनाएको छ ।

जनवरीदेखि मार्चसम्मको अवधिमा निगमका अधिकांश उडानहरू उच्च यात्रुसहित उडान भरिरहेका छन् । निगमले आगामी दिनमा सेवा विस्तार तथा बजार व्यवस्थापनलाई अझ सुदृढ गर्दै वृद्धि दरलाई निरन्तरता दिने लक्ष्य लिएको निगमकी प्रवक्ता अर्चना खड्काले जानकारी दिए ।