काठमाडौँ । अन्तर्राष्ट्रिय क्रिकेट परिषद (आइसीसी) ले महिला टी-२० विश्वकप २०२६ को पूर्ण तालिका सार्वजनिक गरेको छ ।

प्रतियोगिता आगामी १२ जुनदेखि ५ जुलाईसम्म इङ्ग्ल्यान्ड र वेल्समा सञ्चालन हुनेछ । यस पटक समूह चरणमै भारत र पाकिस्तानबीच प्रतिस्पर्धा हुने भएपछि प्रतियोगिताले सुरुदेखि नै विशेष आकर्षण पाउने अपेक्षा गरिएको छ ।

भारत र पाकिस्तानबीचको खेल १४ जुनमा एजबेस्टन मैदानमा हुनेछ । प्रतियोगितामा कुल १२ टोली सहभागी रहनेछन्। आयोजक इङ्ग्ल्यान्डसहित बंगलादेश, आयरल्यान्ड, नेदरल्यान्ड्स र स्कटल्यान्ड छनोट चरण पार गर्दै प्रतियोगितामा पुगेका हुन् । यस संस्करणमा चार युरोपेली राष्ट्रको सहभागिता पहिलोपटक देखिएको छ ।

समूह- १ मा अष्ट्रेलिया, दक्षिण अफ्रिका, भारत, पाकिस्तान, बंगलादेश र नेदरल्यान्ड्स रहेका छन् भने समूह- २ मा वेस्ट इन्डिज, इङ्ग्ल्यान्ड, न्युजिल्यान्ड, श्रीलङ्का, आयरल्यान्ड र स्कटल्यान्ड छन् ।

उद्घाटन खेल १२ जुनमा इङ्ग्ल्यान्ड र श्रीलङ्काबीच हुनेछ। सेमिफाइनल खेल ३० जुन र २ जुलाईमा द ओभलमा तथा फाइनल ५ जुलाईमा ऐतिहासिक लर्ड्स क्रिकेट मैदानमा आयोजना गरिने तालिकामा उल्लेख छ ।

आइसीसीका प्रमुख कार्यकारी अधिकृत सञ्जोग गुप्ताले विश्वकपले विश्वव्यापी विस्तारमा नयाँ अध्याय थप्ने विश्वास व्यक्त गरेका छन् ।