काठमाडौं । काठमाडौँ महानगरले ७० वर्षभन्दा माथिका ज्येष्ठ नागरिकको स्वास्थ्य सर्वेक्षणका क्रममा ४५२ जनामध्ये ११ जनाको अवस्था गम्भीर भेटिएपछि तत्काल अस्पताल पठाउनुपर्ने देखिएको जनाएको छ । साथै २०८ जनालाई नियमित स्वास्थ्य निगरानी आवश्यक रहेको पाइएको छ ।

माघ १८ देखि सुरु गरिएको सर्वेक्षणमा कमजोर आर्थिक अवस्थाका कारण ८२ जना ज्येष्ठ नागरिकले उपचार गर्न कठिनाइ भोगिरहेको र १९२ जना स्वास्थ्य बिमा बाहिर रहेको भेटिएको छ। बिमा नभएका नागरिकलाई बिमा कार्यक्रममा जोड्न सहजीकरण भइरहेको महानगरले जनाएको छ ।

सर्वेक्षणमा उच्च रक्तचाप, मधुमेह, मुटु, दम तथा अन्य दीर्घरोगको समस्या व्यापक देखिएको छ भने केही ज्येष्ठ नागरिक ओछ्यानमा आश्रित अवस्थामा रहेका छन् ।

महानगरले घरमै पुगेर स्वास्थ्य परीक्षण, परामर्श र आवश्यक उपचार सेवा दिने उद्देश्यले सबै वडामा स्वास्थ्यकर्मी परिचालन गरेको जनाएको छ । आर्थिक रूपमा कमजोर, अशक्त वा स्वास्थ्य संस्थासम्म पुग्न नसक्ने ज्येष्ठ नागरिकलाई प्राथमिकतामा राखेर कार्यक्रम सञ्चालन गरिएको छ ।