काठमाडौं । सौन्दर्य एवं मोडलिङ क्षेत्रमा चर्चा बटुलेका दुई महिला प्रतिनिधिसभा सदस्य बनेका छन् । हालै सम्पन्न प्रतिनिधिसभा निर्वाचनमा समानुपातिक तर्फबाट पूर्वमिस नेपाल अनुष्का श्रेष्ठ र मोडल तथा सञ्चारकर्मी रीमा विश्वकर्मा संघीय सांसद बनेका हुन् । दुवै जनालाई राष्ट्रिय स्वतन्त्र पार्टी (रास्वपा)ले समानुपातिकतर्फबाट प्रतिनिधिसभा सदस्य बनाएको हो ।

यससँगै अनुष्का श्रेष्ठ संघीय सांसद बन्ने पहिलो मिस नेपाल बनेकी छन् । अनुष्का सन् २०१९ की मिस नेपाल विजेता हुन् । यसअघि नेपाल क्यान्सर निवारण प्रतिष्ठानले २०८२ सालको क्यालेन्डरमा ‘क्यान्सर निको हुन सक्छ, सुरुमै उपचार गरौँ’ भन्ने सन्देशसहित अनुष्काको तस्बिर प्रकाशित गरेको थियो । अहिले संघीय सांसद बनेपछि खुसी व्यक्त गरेकी छन् ।

उनी सौन्दर्य प्रतियोगिताबाट मात्रै नभइ सामाजिक सन्देश र जनचेतनामूलक अभियानमा समेत सक्रिय छिन् । अहिले देश र जनताको भविष्य बनाउने ठाउँमा पुगेपछि अझ उत्साहित बनेकी छन् । उनी भन्छिन्, ‘म सधैं जनताको आवाज उठाउने छु । साथै, महिलाको हक अधिकारको विषयलाई संसदमा उठाउने छु ।’