काठमाडौं । फागुन २१ गतेको निर्वाचनपछि ठूला दलहरुको आधार भत्किएको छ । राष्ट्रिय स्वतन्त्र पार्टी (रास्वपा) मुख्य राजनीतिक शक्ति भएर उदाएको छ । नेपाली राजनीतिमा राष्ट्रिय शक्तिको रुपमा उदाएको रास्वपा नयाँ सरकार गठनको तयारीमा जुटेको छ ।

रास्वपाले पार्टीका बरिष्ठ नेता बालेन्द्र शाह (बालेन)को नेतृत्वमा सरकार गठन गर्ने भएको छ । चुनावअघि नै रास्वपाले बालेनलाई प्रधानमन्त्रीका रुपमा अगाडि सारेको थियो । त्यहीअनुरुप बालेन चुनावी मैदानमा उत्रिएका थिए । त्यसैले बालेनको नेतृत्वमा रास्वापको सरकार गठन हुनेमा शंका छैन ।

काठमाडौं महानगरको मेयर पद छाडेर रास्वपाबाट चुनाव लडेका बालेन नेतृत्वको सरकारले पहिलो निर्णय के गर्छ भन्नेमा नागरिकमाझ कौतुशलता भएको छ । महानगरको मेयर हुँदा आफ्नो कामकारबाहीबाट चर्चामा आएका बालेनले देशको प्रधानमन्त्री भएपछि जनताको मन जित्ने काम गर्छन् भन्ने जनताको अपेक्षा छ । त्यही अनुरुपमा उनलाई जनताले मत दिएका हुन् ।

त्यसैले देशको प्रधानमन्त्री भएपछि बालेनले जनभावना अनुसार केही बोल्ड निर्णय गर्नुपर्ने हुन्छ । नेपाली जनता संघीयताप्रति सन्तुष्ट छैन । त्यसैले त्यसबारे केही महत्वपूर्ण निर्णय उनले गर्नुपर्छ ।

नागरिक तहबाट उठेका आवाजहरु यस्ता छन् । जो बालेन नेतृत्वको मन्त्रिपरिषदले पहिलो बैठकमै निर्णय गरेको खण्डमा गालीभन्दा ताली बढी पाउने छ । जुन कुरा यहाँ बुँदागत रुपमा प्रस्तुत गरिएको छ ।

१, मन्त्रिपरिषदको पहिलो बैठकमै सरकारी निकायमा रहेका ट्रेड युनियनहरु खारेज गर्ने निर्णय गरियोस् ।
२, प्रदेशहरु खारेज गर्ने निर्णय गर्दै देशका १४ अञ्चललाई पुर्नस्थापित गर्ने निर्णय गरियोस् ।

३, निर्वाचन सुरक्षाका लागि अस्थायी भर्ना गरिएका करिब डेढ लाख निर्वाचन प्रहरीलाई स्थायी गर्ने निर्णय गरियोस् । जसले ती युवाले देशमै सेवा गर्ने मौका पाउने छन् भने विदेशमा रोजगारीका लागि जानुपर्ने बाध्यताबाट मुक्त होस् ।

४, १४ अञ्चलमा एक–एक वटा प्रसुति गृह, अस्पताल र मेडिकल कलेज सञ्चालन गर्ने निर्णय गरियोस् ।

रास्वपाको सरकारको पहिलो मन्त्रिपरिषद बैठकले यी माथि दिएका बुँदाहरुमाथि टिप्पणी गर्दै कार्यान्वयन गर्ने निर्णय गरेको अवस्थामा जनता पनि खुसी हुनेछन् । किनकि, देशको अपूर्ण संघीयताले आर्थिक भार मात्र भएको छ भने नेताका आसेपासेलाई मात्र पोसाउने काम भइरहेको छ । त्यसैले पनि संघीयताप्रति जनता खुसी छैनन् । देशमा सुशासन र समृद्धिको नारा लिएर हालै सम्पन्न निर्वाचनमा पहिलो शक्ति बनेको रास्वपाले जनताको मन जित्नु आवश्यक छ ।

सम्पादकीय नोट : माथि उल्लेखित राय तथा सुझावहरु जनस्तरमा उठ्दै आएको आवाज हुन् । जुन आवाजहरु आक्रोशमा पोखिएकै कारण ठूला दलहरुको आधार भत्किएको हो ।