काठमाडौं । गीतकार तथा गायिका अनिला राई बेलायतको क्याट्रिकमा बस्छिन् । दुई दशकदेखि बेलायत बस्दै आएकी अनिला जन्मभूमि नेपाल र नेपाली गीतसंगीत भनेपछि हुरुक्कै हुन्छिन् । त्यसैले बेलायतमा बसेर पनि उनी गीतसंगीतमा निरन्तर सक्रिय रहँदै आएकी छन् । फुर्सद हुनेवित्तिकै गीत रेर्कड गर्न अनिला टुप्लुक्क नेपाल आइपुग्छिन् । यसपटक पनि उनी क्रिसमसको विदाको अवसर छोपेर नेपाल आएकी छन् ।

यसै अवसरमा अनिलाले एक म्युजिक भिडियो सार्वजनिक गर्नुका साथै चार वटा गीत रेकर्ड गरेकी छन् । एक महिने विदामा नेपाल आएकी अनिलाले यस पटक ‘युद्धभूमि’ बोल गीतको भिडियो ल्याएकी हुन् ।

गायिका अनिलाकै शब्द र शान्तिराम राईको संगीत रहेको ‘युद्धभूमि’ गीतको भिडियोमा अनिलासँगै नन्दराज प्रोचा राई फिचरिङ छन् । यो गीत लाहूरेको जीवन गाथा र पारिवारिक प्रेममा आधारित रहेर तयार गरिएको छ ।

यसैबीच अनिलाले यस पटक आफ्नै शब्द र युवा संगीतकार पवन बान्तवा राईको संगीतमा चार वटा गीत रेर्कडिङ गरेकी छन् । अनिलाले ‘तिमी मेरो साथी’, ‘हे भगवान’, ‘मेरो जीवन’ र ‘बाँसको भाटा’ बोलको गीत गाएकी हुन् । अनिलाले यसपटक आफ्नो धारभन्दा केही फरकशैलीका गीत गाएकी छन् । ‘बाँसको भाटा’ बोलको गीत भने लोकगीत हो ।

विगत दुई दशकदेखि बेलायत बस्दै आएकी अनिलाले हालसम्म एक सयभन्दा बढी गीत गाइसकेकी छन् । उनी भन्छिन्, ‘म जहाँ रहेपनि मेरो मन मुटुमा नेपाल र नेपाली गीतसंगीतमा प्रगाढ लगाव छ । त्यसैले नेपाल आएको बेला गीत र भिडियो निर्माण गर्ने गरेकी छु ।’

अघिल्लोपटक नेपाल आउँदा झण्डै एकदर्जन गीत तथा भिडियो निर्माण गरेकी अनिलाले त्यसबेला फोटोसुटसमेत गर्न भ्याएकी थिइन् । तर, यस पटक भने उनी छोटो विदामा आएको उनी बताउँछिन् । करिब एक महिने विदामा आएकी अनिला यसपटक भने आफ्नो गाउँ सोलु जान भ्याइन् । जुन उनका लागि अविस्मरणीय बनेको छ । उनले भनिन्, ‘गाउँघर परिवर्तन भएछ । गाउँको विकास देख्दा खुसी लाग्यो ।’ उनी यही जनवरी १६ तारिखमा कर्मथलो बेलायत फर्कँदैछिन् ।

फोटो : हरिगोपाल प्रधान
मेकअप : मौसमी कन्दङ्वा लिम्बू

अघिल्लो पटक नेपाल आउँदा खिचिएका अनिला राईका केही तस्बिरहरु :