काठमाडौं । घनश्याम भुसाल समुहले पनि नेकपा एकीकृत समाजवादी छोडेको छ । एकीकृत समाजवादीलाई पुनर्गठन गर्ने बताउदै आएको भुसाल समुहले नयाँ नाम र चुनाव चिह्नसहित आइतबार निर्वाचन आयोग पुगेको छ ।

नेकपा (एकीकृत समाजवादी) का तत्कालीन महासचिव घनश्याम भुसाल पक्षले नयाँ दल दर्ताका लागि निर्वाचन आयोगमा निवेदन दर्ता गराएको हो ।

एकीकृत समाजवादीका नेता डा. विजयकुमार पौडेलसहितको टोलीले आइतबार आयोगमा पुगेर दल दर्ताका लागि निवेदन दिएको हो । भुसाल समुहले पार्टीको नाम नेपाल कम्युनिष्ट पार्टी (वामपन्थी केन्द्र) प्रस्ताव गरेको छ भने चुनाव चिह्न सूर्यमुखी फूल प्रस्ताव गरिएको छ । नयाँ दलमा राजकुकमार कक्षपती संयोजक रहेको २६ सदस्यीय केन्द्रीय समिति प्रस्ताव गरिएको छ ।

स्रोतका अनुसार एकीकृत समाजवादी कायम राख्न भविष्यमा कानुनी बाधा आएमा ‘ब्याकअप’ का रुपमा नयाँ दल दर्ता गरेको बताइएको छ । नेकपा एकीकृत समाजवादीका बहुमत सदस्य १० बाम घटकसहित नेपाली कम्युनिष्ट पार्टी बनेकाले भुसाल समुहलाई आयोगले सो दलको मान्यता नदिएमा दलविहीनको अवस्थामा नरहन उनीहरुले नयाँ दल दर्ता गरेको बुझिएको छ ।