ललितपुर, रक्ष्या क्यान्सर केयर सोसाइटीले हिजो ललितपुरको ग्वार्कोस्थित रोयल ट्युलिपमा स्तन क्यान्सरबारे जागरूकता अभियान सम्पन्न गरेको छ। कार्यक्रममा प्रमुख अतिथिका रूपमा वरिष्ठ हास्य कलाकार हरी बंसा आचार्य उपस्थित थिए।

संगठनकी अध्यक्ष डा. सृष्टि श्रेष्ठ प्रजापतिको अध्यक्षतामा सम्पन्न कार्यक्रममा डा. भीम सापकोटा, डा. अनिल विक्रम कार्की, दिवाकर राज कर्णिकार, श्याम कडेल, तारा थापा, मीरा राणा, लुना लुइटेल, प्रमिता खनाल, डा. जया सत्याल, डा. रोशन प्रजापति, कमला श्रेष्ठ, अजय रत्न स्थापित, हरी गोपाल प्रधान, र राजभाइ सुवाललगायत प्रतिष्ठित व्यक्तित्वहरूको सहभागिता रहेको थियो।

कार्यक्रममा स्तन क्यान्सरको छिटो पत्ता लगाउने तरिका, रोकथामका उपायहरू, र समयमै उपचारको महत्वबारे जानकारीमूलक सत्र सञ्चालन गरिएको थियो। साथै, अतिथिहरूबीच नेपालमा क्यान्सर उपचारका क्रममा देखिने चुनौती र तिनका सम्भावित समाधानबारे अन्तरक्रिया सत्रसमेत आयोजना गरिएको थियो।

कार्यक्रमको विशेष पक्ष भनेको स्तन क्यान्सर जित्न सफल अनेकौं सर्वाइभरहरूको सहभागिता थियो। उनीहरूले आफ्नो संघर्ष र सफलताको प्रेरणादायी अनुभव साझा गरे, जसले उपस्थित सबैलाई गहिरो रूपमा प्रेरित बनायो।

अध्यक्ष डा. सृष्टि श्रेष्ठ प्रजापतिले भनिन्, “क्यान्सरबारे सचेतना नै यसको प्रारम्भिक पहिचान र सफल उपचारको मुख्य आधार हो। महिलाहरूले नियमित स्वास्थ्य परीक्षण गर्नुपर्ने अत्यावश्यकता आजको आवश्यकता हो।”

कार्यक्रमको अन्त्यमा सहभागी अतिथिहरूले स्तन क्यान्सरबिरुद्धको अभियानलाई निरन्तरता दिन प्रतिबद्धता जनाउँदै, यस्ता सचेतना कार्यक्रमलाई देशभर विस्तार गर्नुपर्नेमा जोड दिएका थिए।