काठमाडौं । दुबईले नेपालीलाई भिजिट भिसाका लागि पूर्ण रूपमा बन्द गरेको छ । यसबारे कुनै आधिकारिक जानकारी नगराएपनि दुबईले सोमबारदेखि भिजिट भिसामा जान रोक लगाएको हो ।

शुभयात्रा ट्राभल्स एण्ड टुर्सका सञ्चालक प्रदिप अधिकारीका अनुसार संयुक्त अरब इमिरेट्स (युएई) मा भिसा आवेदन दिँदा भिजिट भिसा कोलममा नेपाल देखाउन छोडेको छ । उनले आइतबारसम्म नेपालीका लागि कोलम राखिएको थियो । तर, त्यो दिन भिसा आवेदन दिएका सबै नेपालीको भिसा अस्वीकृत भएको थियो । तर भारतीयहरूको भने भिसा देखाउँछ । तर अहिले नेपालीले आवेदन नै दिन पाउँदैनन् ।

युएईका लागि नेपाली राजदूत तेजबहादुर क्षेत्रीले भिसा दिन बन्द गरिएकोबारे औपचारिक जानकारी नआएको बताए । अहिलेको निर्णय केही समयको लागि हुनसक्ने उनको भनाइ छ ।

दुबईले नेपालीलाई डिसेम्बरदेखि भिसा दिन बन्द जस्तै गरेको थियो । भिसा पाउने सम्भाभावना नभएपछि नेपालीहरूले युएईको शारजाह राज्यका लागि भिसा आवेदन दिने गरेका थिए । युएईको जुन राज्यका लागि भिसा लिएपनि सबै राज्य घुम्न पाइने भएकाले सहज भएको थियो । अब भने युएईकै लागि भिसा बन्द गरिएको शुभयात्राका सञ्चालक अधिकारीले बताएका छन् ।