एजेन्सी । अमेरिकी राष्ट्रपति डोनाल्ड ट्रम्पले अगस्ट १ देखि भारतमा २५ प्रतिशत कर लगाउने घोषणा गरेका छन् । ट्रम्पले सामाजिक सञ्जाल मार्फत भारतले रूसबाट हतियार र तेल किनिरहेको कारण २५ प्रतिशत करसहित जरिवाना पनि लगाउने बताएका छन् । ट्रम्पले अमेरिकासँग भारतको व्यापार घाटा धेरै उच्च रहेकोले उनीहरूले भारतीय सामानहरूमा कर लगाइने बताए ।

ट्रम्पले भनेका छन्– ‘भारत अमेरिकाको मित्र हो, तर पछिल्ला केही वर्षहरूमा अमेरिकाले भारतसँग कम व्यापार गरेको छ किनभने यसको कर धेरै उच्च छ । वास्तवमा, भारतका धेरै नीतिहरूले अमेरिकी कम्पनीहरूलाई व्यापार गर्न कठिनाइहरू सिर्जना गर्छन् । त्यस्तै भारतले अझै पनि आफ्नो अधिकांश हतियार रुसबाट किन्छ । यति मात्र होइन, भारतले चीनसँगै ठूलो मात्रामा तेल र ग्यास पनि रुसबाट किन्छ, जबकि सारा विश्व रुसले युक्रेनमा हिंसा रोक्न चाहन्छ । यी सबै कारणहरूले गर्दा, अब अमेरिकाले अगस्ट १ देखि भारतबाट आउने सामानहरूमा २५ प्रतिशत कर लगाउने निर्णय गरेको छ । यस बाहेक जरिवाना पनि लगाइनेछ ।’

यसैबीच अमेरिकी अधिकारीहरू द्विपक्षीय व्यापार सम्झौतामा छैटौं चरणको वार्ताको लागि अगस्ट २५ मा भारत आउने बताइएको छ । दुवै देशहरू सेप्टेम्बर(अक्टोबरसम्ममा व्यापार सम्झौताको पहिलो चरण पूरा गर्न काम गरिरहेका छन् । यसका साथै, अन्तरिम व्यापार सम्झौताको सम्भावना पनि खोजी भइरहेको बताइएको छ ।