काठमाडौँ । अमेरिकाको हस्तक्षेपपछि थाइल्याण्ड र कम्बोडियाबीच जारी सैन्य द्वन्द्व अन्त्य हुने सम्भावना देखिएको छ ।

अमेरिकी राष्ट्रपति डोनाल्ड ट्रम्पले तीन दिनको सैन्य झडपपछि दुवै देशका नेताहरू युद्धविरामको लागि तुरुन्तै भेट्न सहमत भएको बताएका छन् । यी झडपहरूमा दुवै देशमा कम्तिमा ३३ जनाको मृत्यु भएको छ भने एक लाख ३० हजार भन्दा बढी मानिसहरू विस्थापित भएका छन् ।

ट्रम्पले कम्बोडिया र थाइल्याण्डका नेताहरूसँग छुट्टाछुट्टै कुरा गरेको बताउदै दुवै नेताहरूलाई द्वन्द्व जारी राखेमा दुवैसँग व्यापार सम्झौतामा प्रवेश नगर्ने चेतावनी दिएको बताएका छन् । हाल स्कटल्याण्ड भ्रमणमा रहेका ट्रम्पले सामाजिक सञ्जालमा लेखेका छन्- ‘दुबै पक्ष तत्काल युद्धविराम र शान्ति चाहन्छन् । उनीहरू तुरुन्तै भेट्न र युद्धविराम र अन्ततः शान्ति स्थापना गर्न सहमत भएका छन्। दुवै देश ‘व्यापार वार्ता टेबल’ मा फर्कन चाहन्छन् ।’

अमेरिकामा आयातमा व्यापक शुल्क लगाउने घोषणाको अंशको रूपमा, उनीहरूले अगस्ट १ सम्ममा धेरै देशहरूसँग छुट्टाछुट्टै सम्झौता गर्ने प्रयास गरिरहेका छन् । ट्रम्पले भने, ‘सबै कुरा सकिएपछि र शान्ति स्थापित भएपछि, म दुवै देशहरूसँगको मेरो व्यापार सम्झौतालाई अन्तिम रूप दिन तत्पर छु।’ 

थाइल्याण्डका कार्यवाहक प्रधानमन्त्री फुमथम भेचायचाईले ट्रम्पलाई धन्यवाद दिँदै थाइल्याण्ड युद्धविराममा सिद्धान्ततः सहमत छ, तर कम्बोडियाबाट इमान्दार मनसाय हेर्न चाहेको बताएका छन् । 

कम्बोडिया र थाइल्याण्डबीच हालै भएको सैन्य झडप दक्षिणपूर्वी एसियाली छिमेकीहरूबीच १३ वर्षमा सबैभन्दा खराब द्वन्द्व हो । थाइल्याण्डको त्राट प्रान्त र कम्बोडियाको पुरसत प्रान्तमा शनिबार झडप तीव्र भएको छ, जसले गर्दा प्रारम्भिक द्वन्द्व क्षेत्रबाट १०० किलोमिटरभन्दा बढी टाढा नयाँ मोर्चा खोलिएको छ । थाइल्याण्डले शनिबारसम्म ७ सैनिक सहित २० जनाको मृत्यु भएको बताएको छ। कम्बोडियाले ५ सैनिक र ८ सर्वसाधारण सहित १३ जनाको मृत्यु भएको बताएको छ ।