काठमाडौँ । राष्ट्रपति रामचन्द्र पौडेलले आन्दोलनका उपलब्धिलाई संस्थागत गर्ने महत्त्वपूर्ण आधार प्रदेश भएको बताउडिया प्रदेशको सफलता नै संघीय लोकतान्त्रिक गणतन्त्रको सफलता भएको बताएका छन्।

बुधबार प्रदेश प्रमुखहरूसँग शीतल निवासमा भेट गर्दै राष्ट्रपति पौडेलले प्रदेशहरू सुदृढ भए मात्र यो व्यवस्था सुदृढ हुने बताएका हुन् । 

 उनले भने- ‘प्रदेशहरू सुदृढ भए यो व्यवस्था नै सुदृढ हुन्छ, संविधानको सम्पूर्ण कार्यान्वयनका लागि आवश्यक पर्ने संघीय, प्रादेशिक र स्थानीय तहका कानुनको तर्जुमा र त्यसको निष्कपट कार्यान्वयनबाटै यो संविधानको औचित्य र सार्थकता प्रमाणित हुन्छ भन्ने मेरो विश्वास छ।’

प्रदेश प्रमुख प्रदेशको प्रमुखमात्र होइन केन्द्रको प्रतिनिधि पनि भएकाले संघ र प्रदेशबीचको समन्वयकर्ता पनि हो र समग्रमा प्रदेश प्रमुखहरू संघीयताको सेतु भएको उनले बताए ।

प्रदेशको आन्तरिक स्रोतको सक्दो प्रयोग गरेर प्रादेशिक विकासका नयाँ–नयाँ सपनाहरू बनाउन, प्रत्येक प्रदेशले आफ्नो मौलिकता निर्माण गरेर अगाडि बढ्न सम्बन्धित सरकारलाई सुझाव दिनुपर्ने आवश्यकता उनले औल्याए । 

सो अवसरमा सातै प्रदेशका प्रदेश प्रमुखहरूले कानुन नियममा रहेका अन्यौल र प्रदेशमा भोग्नुपरेका कठिनाइ बारे जानकारी गराएका थिए ।