काठमाडौँ । प्रधानमन्त्री केपी शर्मा ओलीले सांसदहरुले एक रुपैयाँ खर्च कटौतीको प्रस्ताव राखेकोप्रति असन्तुष्टि व्यक्त गरेका छन् ।

प्रतिनिधि सभामा विनियोजन विधेयकमा प्रधानमन्त्री र मन्त्रिपरिषद्को कार्यालयमाथि सांसदहरुले सोधेका प्रश्नको जवाफ दिदै एक रुपैयाँ खर्च कटौतीको प्रस्ताव राखिएकोलाई ‘विरालो बाध्ने’ चलनको संज्ञा दिदै एक रुपैयाँ घटाउदा बजेट सर्वसम्मत पारित हुन्छ भने घटाउने बताए ।

उनले भने- ‘बजेटबाट एक रुपैयाँ घटाउदा चित्त बुझ्छ भने घटाइदिए हुन्छ । यसको एउटा सिम्बोलिक अर्थ मात्र छ, त्यति मात्र हो, एक रुपैयाँ घटाउदा सर्वसम्मत हुन्छ ? सर्वसम्मत हुन्छ भने एक रुपैयाँ घटाईदिए पनि हुन्छ । बजेट सकेसम्म सन्तुलित ल्याउन खोजिएको छ । म अन्तिम न्याय परम सय यहि हो भन्दिन । कमीकमजोरी नरहेका होलान पनि भन्दिन । निर्विवाद कहिँ पनि हुदैन ।’