काठमाडौँ । अमेरिकी विदेश मन्त्रालयले आफ्ना नागरिकलाई नयाँ सुरक्षा सतर्कता जारी गर्दै विदेशमा बस्ने वा यात्राको क्रममा थप सतर्क रहन आग्रह गरेको छ ।

नयाँ सुरक्षा सतर्कतामा भनिएको छ, ‘इजरायल र इरानबीचको जारी द्वन्द्वले मध्य पूर्वमा यात्रा अवरोध र केही क्षेत्रहरूमा हवाई क्षेत्र बन्द गरेको छ । साथै, विश्वका धेरै भागहरूमा अमेरिकी नागरिकहरू र उनीहरूको हित विरुद्ध विरोध प्रदर्शन हुने सम्भावना छ । यस कारणले गर्दा, अमेरिकी विदेश मन्त्रालयले विश्वभरका सबै अमेरिकी नागरिकहरूलाई थप सावधानी अपनाउन आग्रह गर्दछौं ।’

अमेरिकाले आइतबार बिहान इरानका तीन आणविक स्थलहरू, फोर्डो, नातान्ज र इस्फहानमा आक्रमण गरेपछि इरान र इजरायल युद्ध नयाँ मोडमा पुगेको छ ।

अमेरिकाको यो आक्रमणपछि इरानका विदेशमन्त्री अब्बास अराघचीले अमेरिकाले संयुक्त राष्ट्र संघको बडापत्र उल्लङ्घन गरेको आरोप लगाउदै अमेरिकालाई जवाफ दिने बताएका छन् ।

यसबाहेक, मुस्लिम र अरब देशहरूले पनि इरानमाथिको यो अमेरिकी आक्रमणको आलोचना गरेका छन् र यसलाई अन्तर्राष्ट्रिय कानूनको उल्लङ्घन भनेका छन् ।