काठमाडौं । ललितपुर महानगरपालिकाले सहर क्षेत्रको सडक तथा फुटपाथमा जथाभावी नखन्न स्थानीयलाई आग्रह गरेको छ ।महानगरपालिकाले आज सूचना जारी गर्दै विना स्वीकृति अनाधिकृत रुपमा फुटपाथ र सडकहरुमा खन्ने, फुटाउने तथा उप्काउने कार्य भइरहेको भन्दै त्यसो नगर्न स्थानीयलाई आग्रह गरेको हो ।

यस्तो कार्यले महानगरको सौन्दर्यकरण र वातावरणमासमेत प्रतिकूल असर पर्नुका साथै सवारी दुर्घटनाको जोखिम र पैदल यात्रुलाईसमेत समस्या परेको गुनासो आएको भन्दै महानगरले विना स्वीकृति सडक खन्ने काम भए कारबाही गर्नेसमेत चेतावनी दिएको छ ।

सूचनामा भनिएको छ, ‘नियमअनुसार सहमती लिएर मात्रै सडक तथा फुटपाथ खन्ने कार्य गर्नुहोला । अन्यथा नियमअनुसार कारबाही हुनेछ ।’ महानगरले यस वर्षको वर्षायाम सुरु भएकाले असार, साउन र भदौ (तीन महिना)सम्मको लागि सडक खन्न र फुटपाथ विगार्ने कार्यको स्वीकृतिसमेत रोक्का गरेको छ ।