काठमाडौं । ताप्लेजुङमा खुकुरी प्रहारबाट एक जनाको मृत्यु भएको छ । मंगलबार राति फक्ताङलुङ गाउँपालिका–३ लिङखिमस्थित सिस्ने खोलानजिकै २८ वर्षीय तेजेन्द्र लिम्बू माथि खुकुरी प्रहार हुँदा उनको मृत्यु भएको हो ।

श्रीमती सरितासहित तावास्थित फुपुका घरमा पाहुना आएका उकाली पानीका ३२ वर्षीय अर्जुन गुरुङले सामान्य विवाद हुँदा तेजेन्द्रमाथि खुकुरी हानेका थिए । खुकुरी प्रहारबाट कोखमा गम्भीर चोट लागेका तेजेन्द्रको घटनास्थलमा नै मृत्यु भएको प्रहरीले जनाएको छ । खुकुरी प्रहार गर्ने अर्जुन हतियारसहित फरार छन् । उनकी श्रीमती सरिता पनि प्रहरी सम्पर्कमा छैनन् । प्रहरी निरीक्षक विवेक बस्नेतको टोलीले घटना सम्बन्धमा थप अनुसन्धान गरिरहेको जानकारी दिएको छ ।