एजेन्सी । अमेरिकी राष्ट्रपति डोनाल्ड ट्रम्प र रूसी राष्ट्रपति भ्लादिमिर पुटिनबीच युक्रेन युद्धबारे दुई घण्टाभन्दा लामो टेलिफोन कुराकानी भएको छ । कुराकानीमा ३० दिनसम्म युक्रेनको ऊर्जा र पूर्वाधारमाथिको आक्रमण रोक्न सहमति भएको ह्वाइट हाउसले बताएको छ ।

यो सहमतिले शान्तिको प्रारम्भिक संकेत देखाए पनि युक्रेनले पूर्ण समर्थन गरेको छैन । पुटिनले शान्ति वार्ताका लागि युक्रेनले विदेशी सैन्य सहायता बन्द गर्नुपर्ने शर्त राखेका छन् ।

तर, युक्रेनी राष्ट्रपति भोलोदिमिर जेलेन्स्कीले मंगलबार पत्रकार सम्मेलनमा भने, ‘रूस युद्ध अन्त्य गर्न वा युद्धविरामका लागि तयार छैन । उनीहरूले यो युद्ध रोक्ने मनसाय नराखेको हामीले अमेरिकी सहकर्मीहरूलाई चेतावनी दिएका थियौँ, र यो स्पष्ट देखिन्छ।’ उनले थपे, ‘उनीहरू पहिलो चरणको युद्धविरामका लागि पनि तयार छैनन्।’

ट्रम्पले रूससँग ‘केही सम्पत्ति बाँडफाँट’ बारे छलफल भइरहेको संकेत गरेपछि युरोपेली देशहरूमा चिन्ता बढेको छ । वार्तापछि ट्रम्पले सामाजिक सञ्जालमा यो संवाद ‘महत्वपूर्ण चरण’ मा पुगेको बताए, तर धेरै कुरा टुंगो लाग्न बाँकी रहेको उल्लेख गरे । पुटिनले भने आफ्नो सेना युक्रेनी भूमिमा अघि बढिरहेको र नेटो सेनालाई युक्रेनमा रोक्ने अडान दोहोर्‍याए ।

जेलेन्स्कीले ऊर्जा पूर्वाधारमाथिको आक्रमण रोकलाई ‘समर्थन’ गरे पनि प्रस्तावको विवरण र सहमतिको वास्तविकता जान्न चाहेका छन् । रूसी ऊर्जा पूर्वाधारमाथि आक्रमण रोक्ने विषयमा उनले अमेरिकी मध्यस्थतामा दुवै पक्षबीच सम्झौता सम्भव रहेको बताए ।