काठमाडौं । अमेरिकाबाट पछिल्लो ५६ दिनमा ४३ जना नेपाली डिपोर्ट भएका छन् । डोनाल्ड ट्रम्पले दोस्रोपटक राष्ट्रपतिको कार्यभार सम्हालेयता ४३ जना नेपाली अमेरिकाबाट निष्कासित भएका हुन् । त्रिभुवन अन्तर्राष्ट्रिय विमानस्थलस्थित अध्यागमन कार्यालयकी सूचना अधिकारी सीता परियारले सन् ०२५ जनवरी २० यता हालसम्म ४३ जना नेपाली अमेरिकाबाट डिपोर्ट भई आएको जानकारी दिए ।

ट्रम्पले आप्रवासी नीतिमा कडाइ गरेसँगै पछिल्लोपटक चैत २ गते अमेरिकाबाट एक जना नेपाली डिपोर्ट भई आएको उनले बताए । राष्ट्रपतिको शपथ लिएपछि ट्रम्प प्रशासनले निष्कासन गरिने एक हजार ३६५ नेपालीसहित १४ लाख ४५ हजार ५४९ आप्रवासीको सूची सार्वजनिक गरेको थियो ।

उनीहरू सबैमाथि अवैध तरिकाले अमेरिकामा बसोबास गरेको आरोप लगाइएको छ । सोहीअनुसार अमेरिकामा अवैध रूपमा रहेका नेपाली र भारतीयसहितका विदेशीलाई अमेरिकाले भटाभट डिपोर्ट गरिरहेको छ ।

गएको फागुन २१ गते अमेरिकाले नौ नेपालीलाई डिपोर्ट गरी काठमाडौं पठाएको थियो । अवैध तरिका र बाटोबाट अमेरिका प्रवेश गरेको, गलत मनसाय र बिनाभिसा बसेको जस्ता आरोप डिपोर्ट भएकामाथि लगाइएको छ ।