अमेरिकी हवाई आक्रमणबाट ५३ हुथी विद्रोहीको मृत्यु

काठमाडौं । अमेरिकी हवाई आक्रमणमा यमनमा अहिलेसम्म ५३ जना हुथी विद्रोहीहरूको मृत्यु भएको छ । विद्रोहीहरूको स्वास्थ्य मन्त्रालयले जारी गरेको विज्ञप्तिमा मृत्यु हुनेमा ५ बालबालिका रहेको जनाएको छ ।

अमेरिकी राष्ट्रपति डोनाल्ड ट्म्पको आदेशपछि शनिबारदेखि अमेरिकी सेनाले यमनमा हुथी लक्षित आक्रमण गरिरहेको छ । अमेरिकाले त्यसलाई सैनिक कारबाही भनेको छ । अमेरिकाले यमनमा हुथी विद्रोहीले ‘घुँडा नटेकेसम्म’ आक्रमण जारी राख्ने चेतावनी दिएको छ । अन्तर्राष्ट्रिय समाचार संस्था रोयटर्सले कम्तिमा यो साता अमेरिकाले यमनमा हुथी लक्षित कारबाही जारी राख्ने भनेको छ । यसलाई ट्रप्पको पालाकै सबैभन्दा ठूलो सैन्य कारबाही भनिएको छ ।

‘यो त्यो महत्वपूर्ण जलमार्गमा सम्पत्तिमाथि गोलीबारी रोक्नका लागि हो । जलयात्राको स्वतन्त्रता पुनः खोल्नको लागि हो, जुन संयुक्त राज्य अमेरिकाको मुख्य राष्ट्रिय हित हो, र इरानले धेरै लामो समयदेखि हुथीहरूलाई प्रयोग गरी बाधा पुर्याइरहेको छ,’ हेगसेथले भने ।’ उनीहरूलाई अब पछि हट्नुमै भलाइ छ ।’

यस्तै, अमेरिकी रक्षामन्त्री पिट हेगसेथले आइतबार फक्स न्युजको अन्तर्वार्तामा रेड सीमा अमेरिकी जहाजहरूमा बमबारी गर्दैनौं भनेर घुँडा नटेकेसम्म आक्रमण जारी राख्ने बताएका हुन् । अमेरिकाले मारिएकाहरूमा केही प्रमुख हुथी विद्रोही पनि रहेको बताएको छ । तर, हुथी विद्रोहीहरूले यसको पुष्टि गरेका छैनन् ।

यसैबीच हुथी विद्रोही नेता अब्दुल मलिक अल–हुथीले जबसम्म यमनमा अमेरिकी आक्रमण जारी रहन्छ, तबसम्म हुथी विद्रोहीहरूले लाल सागरमा अमेरिकी जहाजहरूलाई निशाना बनाइरहने चेतावनी दिएका छन् । इसराइल–हमास युद्धपछि नोभेम्बरयता हुथी विद्रोहीले ‘रेड सी’मा अमेरिकी र इसराइली पानीजहाजहरूलाई लक्ष्य गरेर ड्रोन र हवाइ हमला गर्दै आएको छ ।