काठमाडौं । अमेरिकी राष्ट्रपति डोनाल्ड ट्रम्पले युक्रेनसँगको ३० दिने अस्थायी युद्धविराममा सहमत नभए रुसले विनासकारी परिणाम भोग्नुपर्ने चेतावनी दिएका छन् । साउदी अरबको जेद्दामा अमेरिका र युक्रेनबीच वार्ता भएको थियो । उक्त वार्तामा अमेरिकाले गरेको युद्धविरामको प्रस्तावमा युक्रेनले सहमति जनाएको थियो, जसअनुसार ३० दिनको युद्धविराम हुने प्रस्ताव गरिएको छ ।

अमेरिकाले युक्रेन सहमत भएको उक्त प्रस्तावमा सहमत हुन अन्यथा विनासकारी परिणामका लागि तयार रहन रुसलाई चेतावनी दिएका हुन् । ट्रम्पले रुसलाई चेतावनी दिँदै भनेका छन्, ‘यदि मस्कोले युद्धविराम सम्झौतामा हस्ताक्षर गरेन भने उसमाथि विनाशकारी प्रतिबन्ध लाग्न सक्छ । यसको आवश्यकता नपर्ने आशा गरेको उल्लेख गर्दै उनले भनेका, ‘म वित्तीय रूपले यस्तो निर्णय लिन सक्छु, जुन रुसका लागि धेरै खराब सावित हुनेछ । तर, म शान्ति चाहने भएकाले यस्तो नहोस् भन्ने चाहन्छु ।’

रुसले युद्धविरामको प्रस्तावलाई इन्कार गरेको त छैन तर, अमेरिकी दबाबका बाबजुत संयमित प्रतिक्रिया दिएको छ । रुसी राष्ट्रपति भ्लादिमिर पुटिनले बिही ३० दिने अस्थायी युद्धविरामको अमेरिकी प्रस्तावमा आफू ुसैद्धान्तिक रूपमा सहमतु रहेको बताए । तर, त्यसका सर्तहरूमा भने काम गर्नुपर्ने आवश्यकता रहेको औँल्याए ।

पुटिनले अस्थायी युद्धविरामले स्थायी शान्तिको मार्ग प्रशस्त गर्नुपर्ने आवश्यकता औँल्याएका छन् । मस्कोमा दिएको एक प्रतिक्रियामा पुटिनले भनेका छन्( त्यसैले यो प्रस्तावमा आफैँमा सही हो । म निश्चित रूपमा यसको समर्थन गर्छु ।

पुटिनले कुर्स्क क्षेत्रमा रहेका युक्रेनी सैनिकहरूले हतियार विसाउँछन् या विसाउँदैनन् र आत्मसमर्पण गर्छन् या गर्दैनन् भन्ने विषय युद्धविरामअगावै निर्धारित हुनुपर्ने बताएका छन् । साथै उनले युद्धविरामको उल्लंघन हुन सक्ने भएकाले त्यसलाई नियन्त्रण गर्न एक संयन्त्र आवश्यक हुने पनि बताएका छन् ।

यो ३० दिने युद्धविरामलाई युक्रेनले आफ्नो हतियार भण्डार बढाउने मौकाको रूपमा उपयोग गर्न सक्ने पुटिनको चिन्ता छ । उनले भनेका छन्( हामी युद्ध रोक्ने प्रस्तावमा सहमत छौँ । तर, युद्धविरामले स्थायी शान्ति आउनुपर्ने र संकटको मूल कारणको निर्क्यौल गर्नुपर्ने हाम्रो धारणा छ ।

युद्धविराम प्रस्तावबारे पुटिनको जवाफपछि प्रतिक्रिया दिँदै अमेरिकी राष्ट्रपति डोनाल्ड ट्रम्पले त्यसलाई आशावादी भनेका छन् । साथै उनले त्यसलाई अपूर्ण पनि भनेका छन् । ह्वइट हाउसमा नेटो प्रमुख मार्क रुटेसँगको भेटका क्रममा ट्रम्पले भनेका छन्– उनले (पुटिन) ले निकै आशाजनक प्रतिक्रिया दिएका छन्, तर यो पूर्ण भने छैन । म उनीसँग भेट्न या कुरा गर्न इच्छुक छु । तर, हामीले युद्धविरामलाई छिटै पूर्णता दिनुछ ।