वीरगन्ज, आफ्नै साथीको हत्या गरेको आरोपमा पर्सा प्रहरीले तीन जनालाई पक्राउ गरेको छ । प्रहरीले वीरगन्ज महानगरपालिका वडा नम्बर–२७ का इशाल प्रसाद कुर्मीको हत्या गरेको आरोपमा तीन जनालाई पक्राउ गरेको हो ।बिहीबार एक पत्रकार सम्मेलन गरी प्रहरीले पक्राउ गरेका तीनै जनालाई सार्वजनिक गरेको हो । प्रहरीले सार्वजनिक गरेकाहरूमा वीरगन्ज महानगरपालिका वडा नम्बर–२७ बस्ने मुकेश प्रसाद यादव, अरुणकुमार यादव र मुन्ना तिवारी रहेका छन् ।

गत ७ फागुनमा कुर्मीको हत्या भएको थियो । साथीलाई सापटी दिएको पैसा फिर्ता माग्दा कुर्मीको हत्या गरिएको प्रहरीको प्रारम्भिक अनुसन्धानबाट खुलेको छ । पर्सा प्रहरी प्रमुख गौतम मिश्रले सापटी दिएको ३५ सय रुपैयाँ फिर्ता माग्दा आफ्नै साथीले कुर्मीको हत्या गरेको पाइएको बताए । उनका अनुसार ८ दिन अगाडि तास खेल्दा मृतक कुर्मीले सापटी दिएको ३५ सय रुपैयाँ साथी मुकेश प्रसाद यादवसँग मागेका थिए । तर उनले पैसा दिन आनाकानी गरेपछि विवादले उग्ररुप लिएको थियो । त्यसपछि कुर्मीको हत्या भएको पाइएको प्रमुख मिश्रले बताए ।

पक्राउ परेकाहरूले प्रहरीसँगको बयानमा भनेका छन्, ‘यो पैसा माग्दा मुकेस तासमा पनि हारि रहेका थिए, त्यसपछि दुवै जनामा विवाद हुन थाल्यो । अनि मुकेशले मृतक कुर्मीलाई नजिकै रहेको रुखमा बजार्न थाले । त्यसपछि उनी बेहोस भए । बेहोस भएपछि मुकेशले साथीहरूको सहयोगमा नजिकैको खोलामा लगेर फ्यालिदिए ।’ हत्याको पाँच दिन पछाडि प्रहरीको टोलीले वीरगन्ज महानगरपालिका वडा नम्बर–२८ स्थित भेडैया खोलामा शव फेला पारेको थियो । छोरा सम्पर्कविहीन भएको भन्दै परिवारजनले खोजविनका लागि प्रहरीमा निवेदक दिएका थिए ।

त्यसपछि प्रहरीले गरेको अनुसन्धानका क्रममा तीनै जनालाई पक्राउ गरिएको पर्सा प्रहरी प्रमुख मिश्रको भनाइ छ । पक्राउ परेकाहरूमाथि ज्यान सम्बन्धी कसुरमा म्याद थप भई अनुसन्धान सुरु गरिएको प्रहरीले जनाएको छ ।