काठमाडौं । रुपन्देहीको कञ्चन गाउँपालिकामा छोराले आमाको हत्या गरेका छन् । कञ्चन गाउँपालिका १ स्थित सुन्दर टोलमा २० वर्षीय सरोज परियारले आफ्नी ४५ वर्षीया आमा पार्वती परियारको हँसिया प्रहार गरी हत्या गरेका हुन् ।

बुधबार राति कान्छा छोरा सरोजले आँखा र हातमा हँसिया प्रहार गरी पार्वतीको हत्या गरेको इलाका प्रहरी कार्यालय सालझण्डीले जनाएको छ । घटनालगत्तै प्रहरीले उनलाई पक्राउ गरी अनुसन्धान सुरु गरिएको प्रहरीले जनाएको छ ।

प्रहरीका अनुसार सरोज पहिलैदेखि मानसिक रुपमा ठीक थिएनन् । घरमा मृतक पार्वती र उनका कान्छा छोरा मात्रै बस्दै आएका थिए । मृतक परियारका जेठा छोरा रोजगारीका लागि भारतमा रहेका छन् ।