सल्यान । सल्यानको शारदा नगरपालिका वडा नम्बर १ श्रीनगरमा जारी दोस्रो बृहत् सल्यान महोत्सव आगलागी हुँदा स्टलहरू जलेर नष्ट भएको छ ।महोत्सवको आठौं दिन राति ११ बजेतिर आगलागी भएको र सबै सामान जलेर नष्ट भएको हो ।

जिल्ला प्रहरी प्रमुख डिएसपी केशव न्यौपानेले विद्युत् सर्ट भइ आगलागी भएको हुन सक्ने बताएका छन् । आगो नियन्त्रणमा लिन झन्डै साढे तीन घन्टा लागेको डिएसपी न्यौपानेले बताए ।

सल्यान महोत्सवमा झन्डै डेढ सय स्टलहरू रहेका थिए । स्टल राखेका व्यापारीहरू राति सुत्न बाहिर जाने गरेका थिए । रात्रिको समयमा रेखदेखको लागि मेलाका ठेकेदारका मानिसहरूका साथै प्रहरी पनि खटिँदै आएका थिए ।

एक्कासि लागेको आगोबाट क्षतिको यकिन विवरण आइनसकेको डिएसपी न्यौपानेले बताए । श्रीनगरमा माघ १८ गतेदेखि मेला जारी थियो ।