काठमाडौं । काठमाडौंको सुकेधारामा पाँचतारे मर्क्युर होटल सञ्चालनमा आएको छ। करिब तीन अर्ब रूपैयाँको लगानीमा मर्क्युर होटल माघ २ गतेदेखि सञ्चालनमा आएको हो । एबी होल्डिङमार्फत देशबन्धु बस्नेतले होटल निर्माण गरेका हुन् ।

बुधबार प्रधानमन्त्री केपी शर्मा ओलीले होटलको उद्घाटन गरेका थिए । कार्यक्रममा प्रधानमन्त्री ओलीले फ्रान्सेली पर्यटकलाई नेपाल भ्रमण गराउन यस होटलले योगदान दिने विश्वास व्यक्त गरेका थिए। उनले होटल व्यवसायमा नयाँ टेस्ट दिँदै यस व्यवसायलाई प्रोत्साहन दिने अपेक्षा गरे । यस क्षेत्रको विकास र प्रवर्धनका लागि सरकारका तर्फबाट गर्नुपर्ने सहजीकरण गर्ने बताए ।

सुकेधारामा निर्माण गरिएको ११ तले भवनमा १०४ कोठा रहेका छन् । पाँच रोपनी क्षेत्रफलमा फैलिएको यो होटलको टप फ्लोरमा स्विमिङ पुल, होटलमा नेपाली, इन्डियन, चाइनिज रेस्टुरेन्ट, तीन सय क्षमताको ब्यांक्वेट, आधुनिक जिम, स्टिम र साउना, वेलनेस सेन्टरसहितका सेवा सुविधा रहेको छ। होटलले निजी लगानीमा ७० लाख रूपैयाँभन्दा बढी खर्चिएर पक्की सडक निर्माण गरेको छ ।

यो होटल अन्तर्राष्ट्रियस्तरको मर्क्युर ब्रान्डको हो । होटल व्यवसायका क्षेत्रमा विश्वव्यापी सञ्जाल बनाएको कम्पनीको मातहतमा नेपालमा पहिलो पटक मर्क्युर होटेल सञ्चालनमा आएको हो । यो होटलको शुभारम्भसँगै पहिलो पटक फ्रान्सेली ब्रान्डसमेत आएको छ । अकोर होटलको समूहको मर्क्युरसँगै होटलले दिने सेवा सुविधा अन्तर्राष्ट्रिय स्तरको हुने भएको छ। यो होटलमा दुई सय २० जना कर्मचारी कार्यरत छन् ।

यो होटलमार्फत एसिया, युरोप, अफ्रिका एवं मध्यपूर्वका एक सय १० वटा देशमा ५४ सयभन्दा बढी होटल सञ्चालन गरिरहेको अकोर ग्रुप नेपाल भित्रिएको हो । बस्नेतले द मेट्रोपोलिटन होटल प्रालिमार्फत नेपाल भित्र्याएको अकोरले ग्रुप अन्तर्गतको मर्क्युर ब्रान्डले पनि ६० भन्दा बढी देशमा आठ सय १० वटाभन्दा बढी होटल सञ्चालन गरेको जनाएको छ ।