काठमाडौं । नेपालका अग्रणी स्त्री तथा प्रसुती रोग विशेष डा. भोला प्रसाद रिजाललाई ॐ हस्पिटल एण्ड रिसर्च सेन्टरले मिति २०८१ साल मंसिर २९ गते, शनिबार सम्मानित गरेको छ ।

अस्पतालको २८ औँ वार्षिक साधारणसभाको अवसरमा रिजाललाई ॐ हस्पिटल एण्ड रिसर्च सेन्टरको “संस्थापक तथा संरक्षक” विशेष सम्मानबाट सम्मानित गरेको हो ।

डा. रिजाललाई काठमाडौको धुम्बाराही स्थित होटल रामादा–अकामामा आयोजित विशेष समारोहमा अस्पतालका संचालक, शेयरधनी तथा उच्च ब्यबस्थापनका माझ ॐ हस्पिटलका अध्यक्ष डा. आनन्द प्रसाद श्रेष्ठले माला तथा दोसल्ला पहिर्याएर कदरपत्र हस्तान्तरण गरी सम्मानित गरेका थिए ।

अस्पतालका मेडिकल डाईरेक्टर डा. हरिश जोशीले सम्मान पत्र वाचन गरेका थिए भने अस्पतालका संचालकहरु र प्रमुख कार्यकारी अधिकृतले माला तथा खादा पहिर्याएर बधाई तथा शुभकामना व्यक्त गरेका थिए ।

सम्मान ग्रहण गरिसकेपछि सभालाई सम्बोधन गर्दै डा. भोला प्रसाद रिजालले ॐ अस्पताल संचालक समिति, शेयरधनी र अस्पताल ब्यबस्थापनलाई धन्यवाद आभार व्यक्त गरेका थिए ।

अस्पतालको परिकल्पना, शुरुवाति दिनका संधर्ष र यादहरु स्मरण गर्दै उनले आजको ॐ हस्पिटल देशले गर्व गर्न लायकको नीजि क्षेत्रको स्वास्थ्य सेवा प्रदायक बनाउन अहोरात्र लागि परेका सबैलाई धन्यवाद दिए ।

ॐ हस्पिटल आफुले जन्माएको सन्तान सरह लाग्ने भएकाले आफुलाई अत्यन्त प्यारो लाग्ने गरेको र यसका हरेक सुख दुखमा आफु जानकार रहेको बताए । डा. रिजालले यसको हितमा सधै साथ रहेको र भबिष्यमा पनि रहिरहने प्रतिवद्धता जनाए ।

ॐ हस्पिटल संचालक समितिका अध्यक्ष डा. आनन्द प्रसाद श्रेष्ठले सभालाई सम्बोधन गर्दै नेपाली कला, साहित्य , संगीत, चलचित्र, समाज सेवा र सनातन धर्मको सेवामा प्रेरणादायी रुपमा सक्रिय डा. रिजाललाई सम्मानित गर्न पाएर आफू र ॐ अस्पताल परिवार पनि सम्मानित भएको अनुभुती गरिरहेको र सदैव उहाँको आदर्शलाई निरन्तरता दिने प्रण गरे ।

बि.स. २०४६ सालको ऐतिहासिक जनआन्दोलनसँगै नेपालको स्वास्थ्य क्षेत्रमा नीजि क्षेत्रबाट उनको कुशल नेतत्वमा स्थापना भएको तत्कालीन ॐ नर्सिङ्ग होम पछि २०५२ सालदेखि ॐ हस्पिटल एण्ड रिसर्च सेन्टर प्रा।लि।मा रुपान्तरीत भई विगत ३५ वर्षदेखि गुणस्तरीय, आधुनिक र पहुँचयोग्य स्वास्थ्य सेवा प्रदान गर्दै आएको छ ।

उनले नेपालमा आधुनिक चिकित्सा क्षेत्रको स्त्तरबृद्धि गर्ने एवं नयाँ पुस्ताका चिकित्सकहरुलाई प्रेरणा तथा मार्गदर्शन दिनुकासाथै हजारौं महिलाको जीवन रक्षा गर्नु भएकोछ भने नेपालमा नै पहिलो पटक ॐ अस्पतालमा आइ.भि.एफ. सेन्टरको स्थापना गरी हजारौं निःसन्तान दम्पतीहरुलाई वात्सल्य सुख प्रदान गरेको छ ।

साथै ॐ हेल्थ फाउन्डेशन मार्फत नेपालका दुर्गम तथा अति बिकट क्षेत्रहरुमा स्वास्थ्य सेवाको पहुँच पुर्याएर अस्पतालको सामाजिक उत्तरदायित्वको आदर्शसमेत स्थापित गरेका छन् ।

डा. भोला प्रसाद रिजालको निष्ठा, समर्पण र योगदानलाई निरन्तर स्मरण गर्नुकासाथै सधैं ॐ अस्पताल र देशको स्वास्थ्य सेवा प्रणालीलाई अझ सशक्त बनाउन उहाँको प्रेरणादायी भूमिकाको अपेक्षा सधैं रहिरहने अस्पताल जनाएको छ ।

२०४६ सालमा नीजि लगानीमा स्थापित नर्सिङ्गहोम उनीसहित अन्य केही उत्साही चिकित्सक तथा ब्यबस्थापकीय टोलीको कुशल नेतृत्व र चुस्त ब्यबस्थापनको कारणले गर्दा हाल १७५ शैय्याको ३६ वटाभन्दा बढी विशेषज्ञता सेवासहितको अत्याधुनिक सुविधा सम्पन्न अस्पतालको रुपमा सगौरव सेवारत रहेको छ ।

डा. भोला प्रसाद रिजाल र उनको परिवारको समेत ॐ अस्पतालमा मेजर शेयर होल्डिङ्ग यथावत रहेको र श्रीमती सरला रिजाल अस्पतालको संचालक समितिको संचालक समेत रहेको अस्पतालले जनाएको छ ।