काठमाडौं । परराष्ट्रमन्त्री आरजु राणा देउवा शनिबार नेदरल्याण्ड्सको हेग प्रस्थान गरेकी छन् । इन्टरनेशनल कोर्ट अफ जस्टिस (आइसिजे)को जलवायु परिवर्तनसम्बन्धी अन्तर्राष्ट्रिय सुनुवाइमा नेपालको तर्फबाट सहभागिता जनाउन उनी त्यसतर्फ लागेककी हुन् ।

नेदरल्याण्ड्सको हेगमा रहेको उक्त अन्तर्राष्ट्रिय न्यायलयमा गत सोमबार (डिसेम्बर २) देखि सुनुवाइ जारी छ । जलवायु परिवर्तनमा राज्यको भुमिका के हुने भन्ने विषयमा विश्वका सय देश र १२ विभिन्न अन्तर्राष्ट्रिय निकायले सुनुवाइमा भाग लिँदैछन् ।
परराष्ट्रमन्त्री देउवाले डिसेम्बर ९ अर्थात सोमबार दिनको साढे ३ देखि ४ बजे (हेगको समय)सम्म अदालतसमक्ष नेपालको मौखिक धारणा राख्नेछिन् ।

हेग प्रस्थान गर्नुपूर्व उनले जलवायु परिवर्तनका कारण नेपाल जस्ता देशहरुले भोगिरहेको समस्याका बारेमा आवाज उठाउने बताइन् । उनले भनिन्, ‘विश्वको इतिहासमै सबैभन्दा धेरै जनाले विटनेस दिने, आफ्नो मुद्दा राख्ने, यो एउटा परिस्थिति निर्माण भएको छ । सय देशले आफ्नो विषय प्रस्तुत गर्दैछ। हामीले पनि खास गर्छौं ।’

जलवायु परिवर्तनका कारण नेपाल लगायतका देशलाई परेको समस्याहरुमा पीडित देशहरुले हालेको मुद्दामा सुनुवाई र नेपालको हिमाल पग्लिरहेको विषय विशेष रुपमा उठाउने उनले बताइन् ।