काठामाडौं । खोटाङकी एञ्जल राई अध्ययनले फेसन डिजाइनर हुन् । उनी फेसन डिजाइनिङसँगै मोडलिङ र अभिनयमा रुची राख्छिन् । हालैमात्र ‘मिस मंगोल नेपाल–२०२४’को उपाधि जितेकी एञ्जल भन्छिन्, ‘मलाई मोडलिङ र अभिनयमा रुची छ । खाशगरी नाटकमा अभिनय गर्ने मेरो इच्छा छ ।’

‘मिस मंगोल–२०२४’की विजेता आफ्नो इच्चा र रुची पूरा गर्न जस्तोसुकै संघर्ष र संकल्प पूरा गर्न ढृड छिन् । त्यही लगनशीलता र ढृडताकै कारण उनी ‘मिस मंगोल नेपाल–२०२४’को ताज पहिरन सफल भइन् । एञ्जल भन्छिन्, ‘सौन्दर्य प्रतियोगितामा भाग लिएर उपाधि जित्ने मेरो सानैदेखिको इच्छा र सपना थियो, त्यो एउटा इच्छा पूरा भएको छ ।’

एञ्जल मिस मंगोल हुनुअघि ‘मिस राई’ र ‘मिस पुर्वाञ्चल’मा भाग लिएकी थिइन् । ‘मिस राई–२०१८’को विजेता एञ्जल ‘मिस पुर्वाञ्चल–२०१९’की फस्ट रनरअप हुन् । अब उनलाई ‘मिस नेपाल’मा सहभागी हुने इच्छा छ । खोटाङमा ऐंसेलुखर्क–७ माक्पाकी २३ बर्षीया ५ फिट पाँच इन्च उचाइकी एञ्जल भन्छिन्, ‘एकपटक मिस नेपालमा सहभागी हुने इच्छा छ । आफ्नो क्षमताले भ्याएसम्म प्रयास गर्नेछु ।’

‘मिस मंगोल नेपाल’को ताज जितेपछि उनी ‘नेपाल आदिवासी जनजाती महासंघ र नेपाल क्यान्सर निवारण प्रतिष्ठान लगायतका सामाजिक संस्थाको सद्भावना दूत बनेकी छन् । फेसन, मोडलिङ र अभिनयमा रुची राख्ने एञ्जलको लक्ष्य आदिवासी जनजातीका कला र भेषभूषाको प्रवद्र्धन गर्ने रहेको छ ।

एञ्जल भन्छिन्, ‘कुनै पनि आफ्नो इच्छा र सपना पूरा गर्न आत्मविश्वास हुन जरुरी छ । उनी भन्छिन्, ‘रुची र इच्छा भएकाले ‘मिस मंगोल’ पहिल्यैबाट हेर्थेँ । अहिले कलेज सकेपछि भाग लिएकी हुँ । उपाधि जित्न पनि सफल भएँ ।’

सन् २०१८ मा ‘मिस राई’ उपाधि जितेकी एञ्जलले २०१९ मा ‘मिस पूर्वाञ्चल’मा भाग लिएका थिए । ‘मिस पूर्वाञ्चल’मा फस्ट रनर भएकी उनी भन्छिन्, ‘मिस राई भइसकेपछि मोडलिङ पनि गर्न थालेँ, त्यसैले मलाई मोडलिङमा अनुभव भयो । त्यही अनुभवले मिस मंगोल भएँ ।’

‘मिस मंगोल नेपाल’ विजेता भएपछि रेस्पोन्सीवल फिल भइरहेको उनको भनाइ छ । ‘कम्युनिटीलाई नै प्रतिनिधित्व गर्न पाउँदा रेस्पोन्सीवल फिल भइरहेको छ’ उनले भनिन्, ‘आदिवासी जनजाती भएको म गर्व गर्छु । मेरो पढाइ पनि फेसन डिजाइनिङ नै हो । त्यसैले भेषभूषामार्फत आदिवासी जनजाती समुदायलाई राष्ट्रिय तथा अन्तराष्ट्रिय क्षेत्रमा चिनाउन चाहन्छु ।’

एञ्जल भन्छिन्, ‘म बुझ्ने भएदेखि नै फेसनप्रति उत्सुक थिएँ । त्यसैले पढाइ पनि फेसन डिजाइनिङ नै रोजेँ ।’ फेसन डिजाइनर भएकै कारण उनी आफ्नो लागि आफै पहिरन तयार गर्छिन् । उनी भन्छिन्, ‘म आफ्नो लागि आफैं पहिरन तयार गर्छु ।’ एञ्जलका अनुसार फेसन भन्दैमा डिजाइनिङ वेयर नै हुनुपर्छ भन्ने छैन । उनी भन्छिन्, ‘आफूले लगाउँदा जुन पहिरनमा पर्सनालिटी झल्किन्छ र कम्फाटेवल हुन्छ, त्यही नै फेसन हो ।’